शासकीय स्वरुप निर्धारण समितिया प्रारम्भिक मस्यौदा लःल्हात
संविधानसभा अन्तर्गतया शासकीय स्वरुप निर्धारण समितिं तयार याःगु प्रारम्भिक मस्यौदा व अवधारणा सहितया प्रतिवेदन संविधानसभाया अध्यक्षयात लःल्हाःगु दु ।
सोमवाः संविधानसभा अध्यक्ष सुवासचन्द्र नेम्वाङया कार्यकक्षय् समितिया अध्यक्ष शम्भुहजारा दुसादं प्रारम्भिक मस्यौदा व अवधारणा सहितया प्रतिवेदन लःल्हानादीगु खः । उगु इलय् संविधानसभा अध्यक्ष नेम्वाङं आः तक संविधानसभाया बैठक छक्वः नं अवरुद्ध मजूगुलिं इलय् हे संविधान निर्माण जुइगु खँय् विश्वसत जुइत इनाप यानादीगु खः ।
शासकीय स्वरुप निर्धारण समिति दुने दलत दथुइ सहमति जुइमफेवं शसकीय स्वरुप बारे मतदान जूगु खसाः मतदानय् नं गुं नं छगू प्रस्तावं स्पष्ट बहुमत ह्येमफेवं स्वंगूलिं प्रस्तावयात दुथ्याकाः प्रतिवेदन तयार यायेमाःगु खँ समितिया अध्यक्ष दुसादं कनादिल ।
वयेकलं समितिया मतदानय् एनेकपा (माओवादी)या प्रस्तावं दकलय् अप्व मत हःगुलिं उगु प्रस्तावयात दकलय् न्ह्यने, वयां लिपाः कांग्रेस-एमालेया मंकाः प्रस्ताव व दकलय् ल्यूने म्हो मत जक वःगु तराई मधेश लोकतान्त्रिक पार्टीया प्रस्ताव दुथ्याकाः प्रतिवेदन तयार यानाःगु धयादिल ।
समितिया बैठकय् माओवादीं प्रत्यक्ष निर्वाचन पाखें निर्वाचित कार्यकारी राष्ट्रपति, कांग्रेस-एमालें संसदपाखे निर्वाचित कार्यकारी प्रधानमन्त्री व तमलोपां संघीय प्रान्तिय संसदं निर्वाचित कार्यकारी राष्ट्रपतिया प्रस्ताव याःगु खः ।
