माओवादी पाखें सदन बहिष्कार
प्रमुख प्रतिपक्षी दल एनेकप (माओवादीं) प्रधानमन्त्री माधवकुमार नेपालं थीथी निगू विवादास्पद विषयया लिसः बीमाःगु धासें सोमवाःया व्यवस्थापिका संसदया बैठक बहिष्कार याःगु दु ।
प्रधानमन्त्री नेपालं छुं ई न्ह्यः माओवादी नं श्रीलंकाया तामिल टाइगर्स लिटटे थें जुइगु धकाः बियादीगु अभिव्यत्ति व भारतीय सेना प्रमखु दिपक कपुरं माओवादीया लडाकुयात नेपाली सेनाय् समायोजन यायेमज्यूगु धकाः प्वंकूगु अभिव्यक्ति प्रत्ति सदनय् लिसः बीत माओवादीं माग याःगु खः ।
थुगु विषयलय् माओवादी संसदीय दलया उपनेता नारायणकाजी श्रेष्ठ 'प्रकाशं' आइतवा: हे संसदय् माग याःगु खसाः सभामुख सुवासचन्द्र नेम्वाङं प्रधानमन्त्रीयात लिसः बीत रुलिङ यानादीगु खः ।
सभामुख नेम्वाङंया रुलिङ कथं प्रधानमन्त्री सोमवाःया बैठकय् लिसः बीत उपस्थित जुयादीसां लिप्पांगु इलय् वयेक लिसः मबीकं बैठक स्थलं पिहांवनेवं माओवादी सांसद देव गुरुङं प्रधानमन्त्री संसद प्रति उत्तरदायी मजूगु धासें बैठक बहिष्कारया घोषणा यानादीगु खः ।
