७ गतेनिसें हाकनं स्थानीय निकाय ठप्प

येँ (सन्ध्या टाइम्स)/आन्दोलन याना वयाच्वंपिं स्थानीय निकायया कर्मचारीतय्सं हाकनं स्थानीय निकाय ठप्प यायेगु आन्दोलनया ज्याझ्वः घोषणा याःगु दु। निर्णायक आन्दोलन धकाः थौं स्थानीय निकायया केन्द्रीय आन्दोलन संयुक्त समन्वय समितिपाखें अथे आन्दोलनया घोषणा याःगु खः।
वंगु पुस १२ गते नेपाल सरकारया मन्त्रिपरिषदया बैठकं २१ न्हुया दुने माग पुरा यायेगु खँय् आन्दोलनकारी कर्मचारीतलिसे सहमति याःगु खःसा २१ न्हु लिपा नं माग पूरा मजूगु कारणं थःपिं बाध्य जुयाः आन्दोलनय् कुहां वयागु खँ केन्द्रीय आन्दोलन समन्वय समितिं धाःगु दु ।

आन्दोलनया ज्याझ्वः कथं कंस ६ गते तक सरकारयात अल्टिमेटम बीगु, अनं लिपा ७ गतेनिसें हे देय्न्यंकंया स्थानीय निकाय ठप्प यायेगु घोषणा याःगु दु। सरकारया वार्ता पुचःलिसे सहमति जूगु इलय् आन्दोलन गुगु उचाइलय् थ्यनाच्वंगु खः थुगुसी व हे बिन्दुं आन्दोलन शुरु यायेगु जुइ धाःगु दु। आन्दोलनया ज्याझ्वः कथं दमकल, एम्बुलेन्स थेंज्याःगु अत्यावश्यक सेवा बाहेक ७ गतेनिसें हे फुक्क ज्या ठप्प याइगु जूगु दु ।

ट्रेड युनियनया अधिकार दयेमाःगु, २०६५ असार तकया दुने नियुक्त जूपिन्त स्थायी यायेमाःगु, पेशागत सेवा सुरक्षा, स्तर उन्नति यायेमाःगु नापं थीथी कथंया माग तयाः स्थानीय निकायया कर्मचारीत आन्दोलनय् कुहां वयाच्वंगु खः।
उगु आन्दोलन समन्वय समितिइ एनेकपा (माओवादी), नेपाली कांग्रेस, एमाले नापं थीथी राजनीतिक पार्टी नाप लिक्क लाःगु न्यागू कर्मचारी संगठन दुथ्यानाच्वंगु दु ।