जनजातिया सभासदतय्सं रोस्टम घेरे याइगु
येँ (सन्ध्या टाइम्स)/आदिवासी जनजाति सभासद सभा (ककस) पाखें आदिवासी जनजातितय्सं माग यानाच्वंगु आत्मनिर्णयया अधिकार, जातिय स्वायत्तता नापं स्वशासनयात संविधानय् ग्यारेन्टि याकेगु नितिं संविधानसभाया रोस्टम घेराउ याइगु जूगु दु ।
ककस नापं सच्छि न्यय्गू आदिवासी जनजातिया खलः पुचः निसें पार्टीत तकं दुथ्यागु आदिवासी जनजाति वृहत्त मोर्चा नेपाःया म्हिगः च्वंगु संयुक्त परिषदया मुँज्यां आदिवासी जनजातिया अधिकार न्हूगु संविधानय् ग्यारेन्टि याकेत दवाव बीगु नितिं आःयात सांकेतिक कथं संविधानसभाय् दबाव बीगु निंतिं उगु कथं ज्याझ्वः न्ह्याकेगु खँ क्वःछिउगु खः ।
म्हिगः येँय् जूगु उगु मुँज्यां पद्मरत्न तुलाधर, मल्ल के. सुन्दर नापं नीछम्हं मल्याक सल्लाहकारय् नियुक्ति याःगु दुसा चैत्रया दुने राष्ट्रिय भेला यायेगु, राजनीतिक दल व जिल्ला प्रशासनयात ज्ञापन पौ बीगु, स्थानीय विकास मन्त्रालयय् धर्ना च्वनेगु, जिल्ला जिल्लाय् सभा यायेगु, आन्दोलन यानाच्वंगु आदिवासी जनजातिया थीथी मोर्चालिसे एकता यायेगु नितिं वार्ता यायेगु नापं थीथी खँ क्वःछिउगु खः ।
