बाँसुरी धेंधेंबल्लाः
थुगुसीया भाजुवीर सिरपाः
येँ (सन्ध्या टाइम्स)/केन्द्रीय मानन्धर संघया ग्वसालय् १७ क्वःगु भाजुवीर सिरपाः कथं थुगुसी बाँसुरी धेंधेंबल्लाः ज्याझ्वः जुल। थँहिति दबुली जूगु उगु ज्याझ्वः संस्कृति मन्त्री मिनेन्द्र रिजालं उलेज्या यानादीगु खःसा ज्याझ्वः संघया नायः न्हुछेबहादुर मानन्धरया सभापतित्वय् जूगु खः। ज्याझ्वलय् न्वकु रत्नबहादुर न्हूजवाः साय्मिं लसकुस यानादीगु खः ।
ज्याझ्वलय् न्ववासें मू पाहां मन्त्री रिजालं लोप जुजुं वनाच्वंगु बाजंयात हानं म्वाकेगु व नेवाः जातिया परम्परायात न्ह्याका तयेगु ज्या थज्याःगु धेंधेंबल्लाखं याइगु बिचाः प्वंकादिल। थुकिं न्हूगु प्रतिभात पिकाइगु व उमिसं कन्हय्या नेपाः दयेकीगु खँ नं वय्कलं कनादिल।
ज्याझ्वलय् लाय्कुननि मुसमबहाः येँया बाँसुरी खलकं ३०० पूर्णाकय् २४६ ल्याः हयाः न्हाप सिरपाः त्याकूगु दु। अथेहे तःननि व मच्छेगां मानन्धर गुथिं बराबर ल्याः (२३७) हयाः ज्वःलाःगुलिं उकी गोला तःबलय् तःननी लिउ व मछेगां लियांलिउ लाःगु खः ।
कासाया निर्णायक मण्डलय् रमण महर्जन, समिना डंगोल व पुष्प कुमार नातिंपिं च्वनादीगु खः ।
कासाय् न्हाप लाःगु पुचःयात झिद्वः, लिउयात न्याद्वः व लियांलिउयात स्वद्वः तका दां सिरपाः बीगु व्यवस्था दु। थ्वहे वइगु माघ १० गते जगत सुन्दर ब्वनेकुथी जुइगु केन्द्रीय मानन्धर संघया ५७ क्वःगु बुन्हि ज्याझ्वलय् थुकिया सिरपाः लःल्हाइगु ग्वसाः दु ।
धेंधेंबल्लाः कासाय् थीथी हुलाप्याखं नं न्ह्यब्वःगु खः। ज्याझ्वलय् चःमति खलःया रोहिया महर्जनं न्ह्यब्वःगु देवी प्याखं बांलाः तायेकाः मानन्धर संघया सहसचिव गणेश साय्मिं ५०० तका हःपाः कथं अन हे लःल्हानादीगु खः।
भाजुवीर सिरपाः उपसमितिया संयोजक लक्ष्मीदास मानन्धरं सकसितं सुभाय् बियादीगु खः ।
