संयन्त्रया मुँज्या अनिश्चित
येँ (सन्ध्या टाइम्स)/न्हूगु संविधान दयेकेत नापं फुक्क कथंया राजनीतिक समस्यायात समाधान यायेगु नितिं धकाः नेपाली कांग्रेसया सभापति नापं पुलांम्ह प्रधानमन्त्री गिरिजा प्रसाद कोइरालया नेतृत्वय् स्वम्हेसिया दयेकूगु उच्चस्तरीय राजनीतिक संयन्त्रया मुँज्या अनिश्चित जुयाब्यूगु दु ।
थौं च्वनेगु धयातःगु उगु संयन्त्रया दुजः नापं नेकपा (एमाले) या नायः झलनाथ खनाल थौं बहनी जक भारतं लिहां वइगु अले मेम्ह दुजः माओवादीया नायः प्रचण्ड नं थौं हे सल्यानय् वनेगु ज्याझ्वः दुगु हुनिं आः तत्कालया नितिं बैठक अनिश्चित जूगु खः ।
उच्चस्तरीय संयन्त्रया कार्यविधि व कार्य योजना दयेकेगु नाप नापं संयन्त्रय् सु सु तयेगु धइगु खँय् सहलह ब्याकेत थौं मुँज्या च्वनेगु खँ क्वःछिना तःगु खः ।
उच्चस्तरीय राजनीतिक कार्यक्षेत्रया बारे स्पष्ट जुइमा धकाः माग याना वयाच्वनादीम्ह प्रधानमन्त्री माधवकुमार नेपालयात नं उगु संयन्त्रया आमन्त्रित दुजःया रुपय् तयेगु धकाः छुं दिं न्ह्यः संयन्त्रया कजि कोइराला व दुजः प्रचण्डया दथुइ सहमति जूगु खः ।
