भूकम्प सुरक्षा दिवसय् प्रवचन
ख्वप (सन्ध्या टाइम्स)/ माघ २ गते कुन्हु लाकाः दँय्दसं न्यायेकीगु भूकम्प सुरक्षा दिवसया लसताय् शनिवाः ख्वपय् भूकम्प सुरक्षा सम्बन्धी प्रवचन ज्याझ्वः जुल। ज्याझ्वलय् जिल्लान्यंकंया थीथी गैर सरकारी संस्था, उपशाखा, जुनियर रेडक्रसया पदाधिकारीतय् सहभागीता दुगु खः। नेपाल रेडक्रस सोसाइटी ख्वप जिल्ला शाखां ग्वसाः ग्वःगु उगु ज्याझ्वलय् जिल्ला शाखाया सभापति मनोजकुमार थापां जोखिम लागाय् च्वनाच्वंपिं फुक्कं मनूतय्सं भुखाय् ब्वइबलय् जुइफुगु प्रकोपया पूर्व तयारीइ लगे जुया च्वनेमाःगु खँ कनादिल ।
ज्याझ्वलय् महेन्द्र विद्याश्रमया महेन्द्रप्रसाद मास्के, जिल्ला सदस्य केदार त्वनाबासुपिंसं प्रशिक्षण बियादीगु खः। शाखा सभापति कृष्णगोपाल लागेजुं लसकुस यानाः न्ह्याकूगु ज्याझ्वलय् विश्व प्राथमिक उपचार दिवसया लसताय् जूगु उपचार शिविरय् ग्वाहालि यानादीपिंत जिल्ला शाखा सभापति मनोजकुमार थापा व उपसभापति लक्ष्मीनारायण शिल्पकारपिंसं सिरपाः लःल्हानादीगु खः।
