क्यान इन्फोटेक थौं क्वचाइगु
येँ (सन्ध्या टाइम्स)/कम्प्युटर सम्बन्धि लिपांगु विकासया लिसें थुकिया प्रविधिया बारे जानकारी बीगु ल्याखं जुयाच्वंगु 'क्यान इन्फोटेक-२०१०'या मेला थौं क्वचायेत्यंगु दु।
थनया प्रदर्शनी मार्गस्थित भृकुटी मण्डपय् न्ह्यानाच्वंगु मेलाय् न्हापा लिपा स्वयां थुगुसी आपालं स्वकुमित वःगु खँ ग्वसाः खलकं जानकारी बिउगु दु। क्यानं कम्प्युटरया विकासया लिसें थुकिया न्हू न्हूगु जानकारी बीगु ल्याखं वंगु झिंन्यादँ न्ह्यः निसें मदिक थुकथंया मेला संचालन याना वयाच्वंगु दु ।
थुगुसीया मेलाय् सुचना संचार व मनारोञ्जनया ख्यलय् कम्प्युटर प्रविधिया लिपांगु विकास जानकारी बीगु लिसे लिपांगु उपकरण व सेवा नं दुथ्याकातःगु खःसा थुगुसीया मेलाया मू आकर्षण धइगु अनलाइनपाखें नं थुगु मेला स्वये दइगु व्यवस्था क्यानं याःगु खः ।
थुगुसीया मेलाय् नं कम्प्युटरया न्हू न्हूगु प्रविधि व थीथी ब्राण्डया ल्यापटप, सेल्यूलर मोबाइल, पेन-ड्राइभ, आईपड, डिजिटल क्यामेरा लगायतया सछिगू स्वयां अप्वः कम्पनीया निसः व न्हय्निगू स्टल तयातःगु खः। थुगु मेला वंगु बुधवाः निसें शुरु जूगु खः ।
