माग पूवंगुलिं कांग्रेसया बैठक
नेपाली कांग्रेसं सरकार समक्ष न्ह्यब्वःगु ९ बुँदे मागयात म्हिगः प्रधानमन्त्रीपाखें जूगु संवोधन लिपा आः उकियात गुकथं कार्यान्वयन याकेगु धइगु बारे सहलह यायेत थौं कांग्रेसया बैठक च्वंगु दु ।
पुलांम्ह प्रधानमन्त्री व कांग्रेस सभापति गिरिजाप्रसाद कोइरालाया महाराजगाज स्थित निवासय् च्वंगु बैठकय् वइगु इलय् कांग्रेसं म्हितेमाःगु भूमिकायात कयाः सहलह जुइगु खँ कांग्रेस स्रोतं धाःगु दु ।
अथे हे बैठकय् सेना भर्ना सम्बन्धय् वयाच्वंगु विवाद बारे कांग्रेसया स्पष्ट दृष्टिकोण तयार यायेगु बारे नं सहलह जुइ धाःगु दु ।
बैठकय् पशुपतिइ पुजारीया विवाद स्थानीय निकाय गठन व कांग्रेस संसदीय दलया विधानयात कयाः नं सहलह जुइगु खँ धाःगु दु । स्थानीय निकाय गठनया सम्बन्धय् कांग्रेसं मेगु थीथी चीधंगु राजनीतिक पार्टीतलिसे सहलह यायेगु निर्णय कांग्रेसया म्हिगः च्वंगु बैठकं याःगुखः ।
उखे एमाले केन्द्रीय समितिया बैठक थौं नं जारी जुयाच्वंगु दु । थौंया बैठकय् नं महासचिव झलनाथ खनालं न्ह्यब्वयादीगु राजनीतिक प्रतिवेदनय् केन्द्रीय दुजःतय्सं थःपिनि धापू तयेगु ज्या न्ह्यानाच्वंगु दु ।
केन्द्रीय सदस्यतय्सं महासचिवया प्रतिवेदनय् उल्लेख जुयाच्वंगु जबजया संशोधन सम्बन्धी बुँदायात कयाः व्यापक आलोचना यानाच्वंगु खँ एमाले स्रोतं धाःगु दु ।
