इलय् संविधान निर्माण यायेत नागरिक धर्ना
संविधानसभा मार्फत न्हूगु संविधान जारी यायेगु ई सतिनावंसां राजनीतिक दलत थुकी गम्भीर मजूगु धासें लोकतन्त्र व शान्तिया निंतिं नागरिक आन्दोलनया आह्वाय् आइतवाः संविधानसभा भवन न्ह्यने धर्ना ब्यूगु दु ।
इलय् हे संविधान निर्माण यायेगु निंतिं दबाव बीगु ताः तयाः नागरिक आन्दोलनं संविधानसभाया न्ह्यने आइतवाः छताः इलं निसें घौछि घार्ना ब्यूगु खः । धर्ना ज्याझ्वलय् नागरिक अगुवात देवेन्द्रराज पाण्डे, कृष्ण पहाडी, श्याम श्रेष्ठ, खगेन्द्र संग्रौला, भरत प्रधान, सुन्दरमणी दिक्षीत लगायत आपालं नागरिकतय्सं ब्वति काःगु खः ।
धर्नायात सम्बोधन यानादिसें नागरिक अगुवा देवेन्द्रराज पाण्डें संविधान निर्माण व शान्ति प्रकृया गम्भीर संकटय् लायेत्यंगुलिं दबाव बीत धर्ना ज्याझ्वः यायेमाःगु धयादिल । वयेकलं दलत संविधान निर्माण यायेगु स्वयां सत्ताया कासाय् तक्यंना च्वंगु द्वपं बियादिसें संविधान निर्माण यायेगु ज्याय् गम्भीर जुइत दलतय्त इनाप यानादिल ।
अथेहे मेम्ह अगुवा कृष्ण पहाडीं राजनीतिक दलतय्त सहमतिया राजनीति यानाः वनेत इनाप यानादिल । वयेकलं संविधान इलय् हे जारी मजूसाः वर्तमान सभासद्त असफल जुइगु धयादिसें परिवर्तनमुखी संविधान निर्माण यायेत नं इनाप यानादिल ।
