सरकार व भारत सेना समायोजनया विरुद्ध : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' वर्तमान गठबन्धन सरकार व भारत सेना समायोजनया विरुद्ध दुगु खँ धयादीगु दु । वयेकलं सरकार व भारत सेना समायोजनया विरुद्धय् वनाः शान्ति प्रकृया स्यंकेत स्वयाच्वंगु द्वपं बियादिल ।
खोटाङया दिक्तेलय् जूगु न्हापांगु खोटाङ युवा महोत्सवया समापन ज्याझ्वःयात सम्बोधन यानादिसें वयेकलं सरकारय् दुथ्याःगु मन्त्रीतय् धापू व भारतया सुरक्षा प्रमुखया धापू पाखें उपिं सेना समायोजन विरुद्ध वनाः शान्ति प्रकृया स्यंकेत स्वयाच्वंगु स्पष्ट जुइगु धयादिल ।
वयेकलं नागरिक सर्वोच्चताया कार्यान्वयनय् भारत थंज्याःगु देशं नेपाःया राजनीतिलय् हस्तक्षेप यानाः नेपालयात न्ह्याः वनेमब्यूगुलिं राष्ट्रिय स्वाधीनताया निंतिं आन्दोलनय् कुहांवयेमाःगु अवस्था पिहांवःगु दाबी यानादिल । नापं वयेकलं वर्तमान सरकार भारतया एजेन्ट जूगुलिं राष्ट्रिय स्वाधीनता व नागरिक सर्वोच्चताया निंतिं देय्न्यंक माओवादीं अन्तरक्रिया व सहलह मार्फत आन्दोलन न्ह्याकूगु धयादिल ।
पुस १५ गते निसें शुरु जूगु महोत्सवय् भलिबल, सितोरियो कराँते, तेक्वान्दो, एथलेटिक्स, चेस, ब्याडमिन्टन लगायात नीन्हय्गू थीथी विधाय् त्या:पिं कासामिपिंत माओवादी अध्यक्ष प्रचण्डं सिरपा व हनापौ लःल्हानादीगु खः ।
