चितवनया शिविरपाखें अयोग्य लडाकुत छेँ लिहांवन
संयुक्त राष्ट्रघीय नियोग अनमिनं अयोग्य ठहर याःपिं जनमुक्ति सेना स्वंगूगु डिभिजन जुटपानी चितवनया शिविरया माओवादी लडाकुयात आइतवाः विदाइ याःगु दु ।
शिविरय् आइतवा: जूगु छगू समारोहया दथुइ अनमिनं अयोग्य ठहर याःपिं ९१ मिसाः सहित २५८ लडाकुयात नेपाःया निंतिं राष्ट्रसंघीय उच्चायुक्तया ज्यकू प्रमुख रिचर्ड बेनेट, शान्ति मन्त्रालयया सहसचिव विष्णु नेपाल व माओवादीया डेपुटी कमाण्डर चन्द्रप्रकास खनाल 'बलदेवं' विदाई याःगु खः । अनमिनं जुटपानी शिविरपाखें ५८६ लडाकुतय्त अयोग्य ठहर याःगु खसां थीथी कारणं आइतवाः २५८ लडाकुतय्त जक विदा या:गु ख: । ल्यंदुपिंत लिपा हानं छगू ज्याझ्व: सहित विदा यायेगु खँ अनमिनं धा:गु दु ।
विदा जूगु इलय् अयोग्य लडाकुतय्सं शान्ति प्रकृयायात तार्किक निष्कषय् थ्यंकेत थःपिंसं शिविर त्वःताःगु धासें सरकार व अनमिनं थ्व लिपाःया व्यवस्थापन मस्वःसाः हानं विद्रोह यायेगु ख्याच्वः ब्यूगु खः । उमिसं शान्ति स्थापना यायेत थःपिं न्ह्याःगु कथंया योगदान बीत नं तयार जूगु धासें सरकारं थःगु प्रतिबद्धता कथं लडाकु पुनःस्थापना व व्यवस्थापन यायेमाःगु खँय् बः बिल ।
अथेहे उच्चायुक्त बेनेटं शान्ति सम्झौताया मर्म कथं माओवादी लडाकूयात विदा जूगु प्रति प्रशन्नता प्वंकादिल । माओवादी डेपुटी कमाण्डर बलदेवं सरकार शान्ति प्रकृया व लडाकु समायोजन प्रकृया प्रति जिम्मेवार मजूगु द्वपं बियादिल ।
