इलय् हे संविधान निर्माण मजुसाः देशय् अराजकता : पोखरेल
नेकपा (एमाले)या महासचिव ईश्वर पोखरेलं इलय् हे संविधान निर्माण यायेमफुसाः आःया अन्यौल, अराजकता अप्वयाः देय् संकटय् लाइगु ख्याच्वः बियादीगु दु । वयेकलं संविधान निर्माण मजुसाः स्थायी शान्ति, राज्यया पुनःसंरचना जुइमफइगु स्पष्ट यानादिसें देय् व जनतां तःधंगु क्षतिया सामना यायेमालिगु ख्याच्वं नं बियादिल ।
स्वतन्त्र विद्यार्थी युनियन काउन्सिल नेपालया आइतवाः निसें पोखराय् शुरु जूगु गुक्वःगु राष्ट्रिय भेलाया उल्लेज्या यानादिसें वयेकलं दलत दथुइ जूगु विवादया कारणं देशया बहुदलीय व्यवस्थाया पलेसाः हानं एकीकृत सामन्ती प्रथाया पुनराबृत्ति जुइगु खतरा अप्वयावंगु धयादिल । वयेकलं देशय् युगान्तकारी परिवर्तनया घोषणा जुसां दलत दथुइ सहकार्ययात संस्थागत यायेमफुगु धयादिल ।
वयेकलं दलत दथुइ एकता व सहमतिया विकल्प मदुगु धयादिसें छुं नं हालतं इलय् हे न्हूगु संविधान निर्माण यायेमाःगु खँय् बः बियादिल ।
अथेहे महासचिव पोखरेलं गुलिखें क्याम्पसया स्वतन्त्र विद्यार्थी युनियन विकास निर्माणया ज्या ठेक्कप पट्ट याइगु संस्था जुयावनाच्वंगु प्रत्ति आपत्ति प्वंकादिसें विद्यार्थीतय्त शैक्षिक संस्थाया समस्या, संविधान निर्माण, शान्ति स्थापना लगायतया ज्याय् लगेजुइत इनाप यानादिल ।
