माओवादी व मेमेगू दल बराबर : कृष्णा
भारतीय विदेशमन्त्री एसएम कृष्णां भारतं एकीकृत नेकपा (माओवादी) व मेमेगु दलनाप समान व्यवहार याइगु खँ धयादीगु दु ।
स्वन्हुन्यंकया नेपाः भ्रमण क्वचायेकाः आइतवाः भारत लिहांझाये न्ह्यः त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें वयेकलं भारतया नजरय् माओवादी नं मेमेगु संसदवादी दल थें हे जूगु टिप्पणी यानदिल ।
वयेकलं थःगु नेपाः भ्रमण उपलब्धिमूक जूगु कनादिसें थःगु भ्रमणया झ्वलय् निगू देय् दथुइया आपसी हित, नेपाःया संविधान निर्माण लगायतया बारे सहलह जूगु कनादिल ।
नेपाः भ्रमणया निंतिं शुक्रवाः नेपाः थ्यंकादीम्ह कृष्णां राष्ट्रपति डा. रामवरण यादव, प्रधानमन्त्री माधवकुमार नेपाल, सभामुख सुवास नेम्वाङ, उपप्रधान नापं परराष्ट्रमन्त्री सुजाता कोइराला, नेपाली कांग्रेसया सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' नाप खँल्हाबंला यानादीगु खः । वयेकलं आइतवाः हे संविधानसभाय् प्रतिनिधित्व याइगु नीन्यागूलिं दलया प्रमुख सचेतकत नाप नं खँल्हाबंला यानादीगु खः ।
