जनजातिया निगू मोर्चा एकता याइगु
येँ(सन्ध्या टाइम्स)/आत्मनिर्णय अधिकार, स्वायत्तता नापं जातीय स्वशासनयात नेपाःया न्हूगु संविधानय् ग्यारेन्टी यायेमाः धकाः माग यानाः आन्दोलन याना वयाच्वंगु आदिवासी जनजातिया निगू मोर्चायात एकता यायेगु निंतिं उगु मोर्चाया नेतातय्सं गृहकार्य यानाच्वंगु दु ।
जातीय खलः, पुचः नापं जातीय पार्टी समेत दुथ्याकाः सछि व न्यागू संस्थागत दुजःत दुगु डा. कृष्ण बहादुर भट्टचनया नेतृत्व गठित आदिवासी जनजाति वृहत् संयुक्त मोर्चा, नेपाः व थीथी जातीय मोर्चातय्गु नं मंकाःगु मोर्चा कथं दयेकातःगु कुमार योञ्जन तामाङं नेतृत्व यानादीगु आदिवासी जनजाति वृहत् मोर्चाया दथुइ उगु कथं एकता यायेगु तयारी यानाच्वंगु दु ।
निगू मोर्चा एकता यायेगु तयारीया हे झ्वलय् आदिवासी जनजाति वृहत् मोर्चा नेपालया म्हिगः मुँज्या च्वंगु खःसा थौं उगु मोर्चाया दुजः खलः पुचः व पार्टी यानाः सछि व न्यागू संस्थागत दुजःया निम्ह निम्ह प्रतिनिधि दुथ्याकाः संयुक्त परिषदया येँय् च्वनेत्यंगु दु। उगु मुँज्याय् निगू मोर्चा एकता यायेगु विषययात कयाः सहलह जुइ धाःगु दु ।
उकथं हे आदिवासी जनजाति वृहत् मोर्चां नं वइगु १९ गते वृहत् भेला सःतेगु तयारी याःगु दु ।
आदिवासी जनजातितय्गु मंकाः माग जुयाः नं ब्यागलं ब्यागलं निगू मोर्चा दयेकाः ब्यागलं ब्यागलं आन्दोलन यानाच्वंगु हुनिं आदिवासी जनजातितय्त समस्या ब्वलन धकाः एकता यायेत व्यापक रुपं दवाव वयेवं अथे नेतृत्व पंक्तिं निगू हे मोर्चायात एकता यायेगु तयारी याःगु खः ।
