सुवर्णकेशरीयात जरिमैयाँ सिरपाः

ख्वप (सन्ध्या टाइम्स)/ नेपालभाषा साहित्य लागाय् सृजनशील मिसाच्वमिपिंत दँय्दसं बिया वयाच्वंगु जरिमैयाँ साखः लुमन्ति सिरपाः थुगु दँय् बाखंच्वमि सुवर्ण केशरीयात बीगु क्वःछित। नेपाल साहित्य मन्दिरया नकतिनि च्वंगु बैठकं ल्यज्या पुचःया सिफारिस कथं बाखंच्वमि केशरीयात बाखंया लागाय् न्ह्यथनेबहःगु तिबः बिउगुलिं थ्व सिरपाः बीगु खँ क्वःछिउगु खः। सिरपाःया कथं झिद्वः तका दां व हनासिजःपौ बीगु जुइ ।

बैठक साहित्य मन्दिरया नायः तिलक प्रकाशया सभापतित्वय् च्वंगु खः। थ्यंमथ्यं प्यंगूत्या दशकंनिसें नेवाः भाय्या बाखं विधाय् च्वसा न्ह्याकावःम्ह मय्जु सुवर्ण केशरीया 'गुँच्व मूपुली' व 'इलं फपुइकी' यानाः निगू बाखं मुना सफू पिदंगु दु। समाजसेवी कुमार साखःजुं छगू अक्षयकोष दयेकाः पलिस्था यानातःगु उगु सिरपाः थ्वयां न्ह्यः कवयित्री प्रतिसरा साय्मि, उपन्यासकार शशिकला मानन्धर व समालोचक प्रा. प्रेमशान्ति तुलाधरयात बीधुंकूगु दु ।