यलया गुगुं सम्पदा पुनर्निर्माण
यल (सन्ध्या टाइम्स)/भारत सरकारया ग्वाहालि कथं नेपाः सरकारं यल उपमहानगरपालिका गुंगू थीथी ऐतिहासिक सांस्कृतिक सम्पदा पुनर्निर्माण याना बीगु जूगु दु। 'ललितपुर विकासको लागि समाज' नांगु संस्थापाखें याःगु प्रस्ताव कथं भारतया अनुदान कयाः यलया थ्व गुंगू थाय्या पुनर्निर्माण यायेत्यंगु खः ।
आः नकतिनि छगू ज्याझ्वःया दथुइ ललितपुर विकासका लागि समाजया अध्यक्ष बुद्धिराज वज्राचार्य, भौतिक योजना मन्त्रालय शहरी विकास विभागया सिनियर इन्जिनीयर सरोज कुमार वैद्य व भारतीय राजदूतावासया काउन्सिलर पुनीत कुण्डल दथुइ उगु सहमतिइ हस्ताक्षर जूगु खः।
सहमति कथं थ्व ज्याया लागिं भारत सरकारं ३ करोड २६ लाख तका दां नेपाःयात अनुदान उपलब्ध याकी ।
थ्व दामं आः यल उपमनपा वडा २ लय् लाःगु इन्द्रायणी पार्क सानेपाया सेट दयेकेगु, वडा ८ या सतः पुनर्निर्माण यायेगु, वडा १८ या दौबहाःया कलात्मक ध्वाखा व पःखाः पुनर्निर्माण यायेगु, वडा १९ य् लाःगु मछिन्द्रबहालया क्यब दयेकेगु, अन हे च्वंगु सतः व कलात्मक ध्वाखा दयेकेगु, लोक कीर्ति महाविहार (किनू बही) पुनर्निर्माण यायेगु, वडा २० या नःबहालय् गमलाया क्यब दयेकेगु, वडा २२ य् लाःगु नापीचन्द्र महाविहार पुनर्निर्माण यायेगु व शंखमुल मसानघाटया पुनर्निर्माण यायेगु ज्या न्ह्याकीगु खँ ललितपुर विकासको लागि समाजं धाःगु दु ।
थ्व ज्यापाखें यलया नांजाःगु ऐतिहासिक सम्पदात ताः ई तक ल्यनाच्वनीगु नापं अनया वातावरण सुधार जुयाः स्थानीय जनतायात नापं लाभ जू वनीगु आशा यानातःगु दु ।
