नेप्से व भारतया सिडिएसएल दथुइ हस्ताक्षर
येँ (सन्ध्या टाइम्स)/नेपाल स्टक एक्सचेन्ज (नेप्से)या महाप्रबन्धक शंकरमान सिंह व सेन्ट्रल डिपोजिटरी एण्ड सर्भिसेस (सिडिएसएल) भारतया कार्यकारी निर्देशक दथुइ वंगु शुक्रवाः छगू सहमति पत्रय् हस्ताक्षर यायेगु ज्या जूगु दु।
नेपालय् केन्द्रीय निक्षेप सेवा व राफसाफया लिसें फर्छ्यौट प्रणालीयात कयाः नेपाःया उप-प्रधानमन्त्री लिसें परराष्ट्रमन्त्री सुजाता कोइराला व भारतीय विदेश मन्त्री एसएम कृष्णाया उपस्थितिइ उगु हस्ताक्षर यायेगु ज्या जूगु खः ।
केन्द्रीय निक्षेप प्रणालीइ शेयरधनीतय्गु धितोपत्रयात विद्युतीया बही खाताया शैलीइ भौतिक प्रमाणपत्रयात विद्युतीय रुपय् हिली। गुकियात 'डिम्याटियरिलाइजेशन' धाइ। नेपाःया पूँजी बजारय् समस्या खने दयाच्वंगु इलय् पूर्णरुपं कम्प्युटरकृत जुइगु थुगु व्यवस्थां समस्या ज्यंकेगु निंतिं संबोधन याइगु विश्वास काःगु दु। अन्तर्राष्ट्रिय क्षेत्रय् तकं राफसाफ व फर्छ्यौटया निंतिं सिडिएस प्रणाली छ्यलेगु याना वयाच्वंगु दु ।
थुगु व्यवस्था कथं आः छ्यलाबुलाय् वयाच्वंगु भौतिक धितोपत्रयात सुरक्षित व विश्वसनीय रुपं कम्प्युटकृत यानाः बही खाताय् यंकेगु ज्या जुइसा थुगु व्यवस्था लिपा शेयर लगानीकर्तां कारोबार यायेधुंकाः भौतिक प्रमाण-पत्र आवश्यक जुइमखु ।
कारोबार लिपा सुचीकृत शेयर केन्द्रीकृत रुपं अभिलेख तयेगु ज्या जुइ। वयां लिपा धाःसा लगानीकर्ताया सिडिएस खाता दइगु व कारोबार लिपा शेयर मिउम्हेसिया खाताय् क्वपालेगु व न्याना काःम्ह लगानीकर्ताया खाताय् जोडे याना यंकेगु ज्या जुइ ।
थुगु सिडिएस प्रणालीं लगानीकर्ताया खाता व्यवस्थापन व अद्यावधिक यायेगु, शेयर प्रमाणपत्रया निक्षेप, अन्तरखाता व आन्तरिक खाता स्थानान्तरण, खाता विवरण, कारोबार राफसाफ, व्यवस्थापन विवरण नापं संस्थागत रुपं जूगु निर्णयाया जानकारी बीगु व्यवस्थापनया ज्याय् ग्वाहालि याइगु खँ जानकारी बिउगु दु ।
