नेम्वाङ व कृष्णा दथुइ खँल्हाबंला
नेपाःया स्वन्हुन्यंकया भ्रमणय् दीम्ह भारतीय विदेशमन्त्री एसएम कृष्णा संविधानसभाया अध्यक्ष सुवास नेम्वाङयात आइतवाः नापलाना खँल्हाबंला यानदीगु दु ।
वयेकपिं दथुइ नेपाःया शान्ति प्रकृया, संविधान निर्माण व लिप्पांगु राजनीतिक अवस्थाया बारे खँल्हाबंला जूगु खः । उगु इलय् विदेशमन्त्री कृष्णां संविधान निर्माणया प्रगति बारे च्यूताः प्वंकादीगु खसाः सभाध्यक्ष नेम्वाङं राजनीतिक गतिरोध जुसां संविधान निर्माण यायेगु ज्या निरन्तर जुयाच्वंगु धयादिल । नापं वयेकलं निर्धारित ईया दुने हे जनादेश बमोजिम संविधान निर्माण यायेत संविधानसभा व नेपाःया राजनीतिक दलत सफल जुइगु धयादिल ।
उगु इलय् भारतीय विदेश मन्त्री कृष्णां नेपाःया जारी शान्ति प्रकृया, संविधान च्वयेगु नापं राजनीतिक स्थायित्व व समृद्धिया पक्षय् भारतीय ग्वाहालि जारी जुयाच्वनीगु प्रतिबद्धता प्वंकादिल ।
