'राज्य पुनःसंरचना लिपाः स्थानीय निकायया चुनाव'
स्थानीय विकासमन्त्री पूर्णकुमार सेर्मां स्थानीय पदाधिकारीया पूर्ति निर्वाचन पाखें याइगु खँ धयादीगु दु । मन्त्री सेर्मां तत्काल स्थानीय निकायया चुनाव जुइमफइगु धयादिसें राज्य पुनःसंरचना लिपाः स्थानीय निकायया निर्वाचन जुइगु धयादिल ।
उदयपुर सिमेन्ट उद्योगय् आइतवाः ग्वसाःग्वःगु ज्याझ्वलय् पत्रकारत नाप खँल्हाबंला यानादिसें वयेकलं गाविसय् कार्यरत सचिवतय् अभावया कारणं विकास निर्माणया ज्या नापं जनप्रतिनिधितय् ज्या यायेत समस्या जूगु धयादिल । वयेकलं गांया विकास मजुइकं सहरी विकास असम्भव जूगु दाबी नं यानादिल ।
अथेहे वयेकलं शान्ति प्रकृयायात तार्किक निष्कर्षय् थ्यंकेत व इलय् हे संविधान निर्माण यायेत उच्चस्तरी संयन्त्र क्रियाशील जुइमाःगु खँय् बः बियादिल । वयेकलं थुगु संयन्त्रं दलत दथुइया असमझदारीयात म्हो यानाः इलय् हे संविधान जारी यायेत सहज वातावरण तयार याइगु विश्वास प्वंकादिल । नापं वयेकलं उच्चस्तरीय संयन्त्र गठन नापं सरकारं याकनं हे सत्य निरुपण व मेलमिलाप आयोग गठन यानाः शान्ति प्रकृयाय् मेगू महत्वपूर्ण ज्या याइगु कनादिल ।
मन्त्री सेर्मां माओवादीं न्ह्याकाच्वंगु चन्दा आतंक, छेँबुँ कब्जा यायेगु ज्यां कानुनी राज्य स्थापना यायेत थाकूगु द्वपं नं बियादिल ।
