राष्ट्रिय स्वाधिनताया बारे सहलह जुल : प्रचण्ड
राष्ट्रिय स्वाधिनतया नारा सहित प्यंगुगू चरणया आन्दोलन यानाच्वंगु एनेकपा (माओवादी)या अध्यक्ष पुष्पकमल दाहाल 'प्रचण्डं' नेपाः भ्रमणय् दीम्ह भारतीय विदेशमन्त्री एसएम कृष्णानाप असमान सन्धी, सीमा समस्या व राष्ट्रिय स्वाधिनताया बारे खँल्हाबंला जूगु खँ धयादीगु दु ।
माओवादी अध्यक्ष व भारतीय विदेशमन्त्री कृष्णा दथुइ शनिवाः सनिलय् येँया होटल द्वारिकाजय् खँल्हाबंलाय् जूगु खः । माओवादीं ल्ह्वनाच्वंगु असमान सन्धी, सीमा समस्या नापं थःपिनिगु च्यूतवाःया बारे खुलस्त रुपं विदेशमन्त्री कृष्णा समक्ष तयाःगु खँ माओवादी अध्यक्षं प्रचण्डं कनादिल ।
अथेहे खँल्हाबंलाय् भारतीय पक्षं राज्य पुर्नसंरचना व शान्ति प्रकृया बारे च्यूताः प्वंकूगु खः । नापं शान्ति प्रकृयायात निष्कर्षय् थ्यंकेत सहलह व सहमतिया हे माध्यमं जुइमाःगु खँय् नं भारतं बः ब्यूगु खँ प्रचण्डं धयादिल ।
प्रचण्डं भारतीय विदेशमन्त्री नाप सरकार परिवर्तनया बारे खँल्हाबंला मजूगु धयादिल । अथेहे वयेकलं थुगु बार्तां पाखें 'आइशब्रेक'य् जूगु मखुसां भारत नापया स्वापू बांलाकेत न्हूगु शुरुवात जूगु धयादिल ।
