फोरम नाप वार्ता यायेत सरकारपाखें वार्ता समिति गठन
आन्दोलनया तयारी यानाच्वंगु मधेशी जनअधिकार फोरमनाप वार्ता यायेत सरकारं शान्ति मन्त्री रकम चेम्जोङया संयोजकत्वय् स्वम्ह दुजः दुगु वार्ता समिति गठन याःगु दु । समितिइ संस्कृति मन्त्री डा. मिनेन्द्र रिजाल व कानुन मन्त्री प्रमेबहादुर सिंह दुजः कथं दी ।
सरकार व मंकाः मधेशी मोर्चा दथुइ जूगु सम्झौता कार्यान्वयन यायेमाःगु व सरकार मधेशीतय् माग प्रति गम्भीर मजूगु धासें फोरमं आन्दोलनया घोषणा याःगु खः । शनिवाः विराटनगरय् संचारकर्मीनाप खँल्हानादिसें शान्तिमन्त्री चेम्जोङं आन्दोलन यायेत तयरा जूगु फोरम नाप वार्ता यायेत थःगु हे संयोजकत्वय् स्वम्ह दुजः दुगु वार्ता समिति गठन जूगु कनादिल ।
वयेकलं वार्ता पाखें फोरमया मागया विषयलय् सहलह यायेत सरकार तयार जूगु धयादिसें फोरमया नेतात नाप सरकारं परामर्श व सहलह यानाच्वंगु व याकनं हे वार्ता याइगु कनादिल । अथेहे वयेकलं न्हूगु संविधान च्वयेत याक्व ई मदुगुलिं आन्दोलन याना सुयां नं कल्याण मजुइगुलिं वार्ता वयेत नं फोरमयात इनाप यानादिल ।
अथेहे सशस्त्र भूमिगत संगठन नाप वार्ता यायेत सरकारं शान्तिमन्त्री जक दुगु वार्ता समितियात नं पूर्णता ब्यूगु दु । उगु वार्त समितिइ संस्कृति मन्त्री रिजाल व उद्योग मन्त्री महेन्द्र राय यादवयात दुजः कथं दुथ्याकूगु खँ नं मन्त्री चेम्जोङं कनादिल ।
