कृष्णां राष्ट्रपति व नेपाली कांग्रेसया सभापति नापलात
भारतीय विदेशमन्त्री एसएम कृष्णां नेपाःया राष्ट्रपति डा. रामवरण यादव व नेपाली कांग्रेसया सभापति गिरिजाप्रसाद कोइरालायात नापलाना खँल्हाबंला यानादीगु दु ।
राष्ट्रपति भवन शितल निवासय् शनिवाः सनिलय् जूगु खँल्हाबंलाय् नेपाःया शान्ति प्रकृया व संविधान निर्माण लगायतया बारे खँल्हाबंला जूगु खः । उगु इलय् विदेशमन्त्री कृष्णां फागुन ३ गते भारतया औपचारिक भ्रमण यायेत इनाप यानादीगु खः ।
खँल्हाबंला लिपाः विदेशमन्त्री कृष्णां गणतान्त्रिक नेपाःया न्हापांम्ह राष्ट्रपतियात लसकुस यायेत भारतीय जनता इच्छुक जूगु कनादिल । अथेहे राष्ट्रपति यादव नाप नेपाःया शान्ति प्रकृया व संविधान निर्माणया बारे सामान्य खँल्हाबंला जूगु कनादिल ।
अथेहे कांग्रेस सभापति कोइराला नाप नं वयेकलं शनिवाः हे खँल्हाबंला यानादीगु दु । वयेकपिं दथुइ खँल्हाबंला जुसां थुकीया विस्तृत विवरण पिहांवये मफुनी । न्ह्यावलें थः ग्वाहालिमि सहित च्वनाः पाहँत नाप खँल्हाबंला यानादीम्ह कोइरालं भारतीय विदेशमन्त्री नापया खँल्हाबंलाया झ्वलय् धाःसाः थः याकचा च्वनाः खँल्हाबंला यानादीगु खः ।
