लिप्पांगु समझदारी आशाप्रद जूगु लेनग्रेनया धापू
नेपाः स्थित राष्ट्रसंघीय अनमिन प्रमुख करिन लेनग्रेनं सरकार व दलत दथुइ लिप्पांगु इलय् खनेगुदु समझदारीं आम सहमति निर्माण यायेत ग्वाहालि जुइगु विश्वास प्वंकादीगु दु ।
राष्ट्रसंघीय सुरक्षा परिषदया न्यूयोर्कय् जुयाच्वंगु बैठकय् न्ववानादिसें वयेकलं राजनीतिक दलत दथुइ तच्वकं गतिरोध दुसां सरकार व राजनीतिक दलत पाखें छुं ई न्ह्यः ल्ह्वंगु पलाखं दलत दथुइ इच्छा शक्तिया साथ न्ह्याः वनाः लोकतान्त्रिक रुपान्तरणया निंतिं रचनात्मक ग्वाहालि जुइगु धयादिल ।
वयेकलं थम्हं नोभेम्वर ६लय् राष्ट्रसंघयात प्रतिवेदन लःल्हानाःगु इलय् शान्ति प्रकृयाया संवेदनशिलता व भंग जुइगु च्यूताः न्ह्यथंनाःगु धयादिसें अज्याःगु च्यूताः अझ नं ल्यंदनीगु तर वंगु छुं वाया दुने मुख्य दलया नेततय्सं हानं शान्ति नाप स्वापू दुगु मुख्य मुद्दायात ध्यान बीत स्व:गु धयादिल । वयेकलं थुगु विकासक्रमं मुख्य राजनीतिक मुद्दाय् आम सहमतिया आधार निर्माण यानाः न्ह्याः वनेत ग्वाहालि जुइगु धयादिल ।
अथेहे वयेकलं माओवादीं संसदया अवरोध चीकूगु, उच्चस्तरीय संयन्त्र स्थापना जूगु व अयोग्य लडाकूया विदाइ थंज्याःगु ज्या जूगु धइगु सकारात्मक पलाः कथं व्याख्या यानादिल । नापं वयेकलं छुं राजनीतिक दलय् खनेदुगु आन्तरिक विरोध सहित उच्चस्तरीय राजनीतिक संयन्त्रय् यक्व हाथ्यात दुगु धयादिल ।
