संविधानसभाया औचित्य सिधइगु फोरमया ख्याच्वः
मधेशी जनअधिकार फोरमं राज्य पुर्नसंरचना व राज्य शक्तिया बाँडफाँड समितिं प्रस्तावित प्रस्ताव पारित जूसाः संविधानसभाया औचित्य सिधइगु ख्याच्वः ब्यूगु दु ।
शुक्रवाः राज्य संरचना तयार यायेत गठन जूगु उपसमितिं झिंप्यगू व खुगू राज्य सहितया निगू विकल्प राज्य संरचनाया खाका प्रस्ताव याःगु खः । माओवादीया सभासद् हितमान शाक्यया संयाजकत्वय् एमालेया मंगलसिद्धि मानन्धर, कांग्रेसया नरहरि आचार्य, फोरमया जयप्रकाश गुप्ता व राप्रपाया प्रतिभा राणा दुथ्याःगु उपसमितिं उगु प्रस्ताव तयार याःगु खः ।
प्रस्तावया बारे थःगु धारणा पितबीत फोरमं शनिवाः येँ याःगु पत्रकार सम्मेलनय् न्ववानादिसें फोरमया सहअध्यक्ष नापं उपसमितिया दुजः गुप्तां राज्य पुनःसंरचना समितिं उपसमिति पाखें प्रस्ताव याःगु प्रस्ताव पारित याःसाः मधेशया निंतिं संविधानसभाया औचित्य क्वचाइगु खँ धयादिल ।
वयेकलं उगु प्रस्तावं मधेशया टुक्रा यायेत स्वःगु धयादिसें उगु प्रस्ताव फोरमया अमान्य जुइगु धयादिल । अथेहे वयेकलं थुकीयात हे कयाः मधेश केन्द्रीत आन्दोलन यायेगु ख्याच्वः नं बियादिल । नापं सरकारय् दुथ्याःगु मधेशवादी दलतय्त नं सरकार त्वःता आन्दोलनय् वयेत इनाप यानादिल ।
पत्रकार सम्मेलनय् पार्टी अध्यक्ष उपेन्द्र यादवं कांग्रेस, एमाले व माओवादी मधेशया विरुद्ध लगेजुयाच्वंगु द्वपं बियादिसें उमिसं हानं नं देय्यात महेन्द्रं थें राज्याया संरचना यायेत स्वाःगु धयादिल ।
उपसमितिं खप्तड, कर्णाली, थरुहट, मगरात, पश्चिम मधेश, तमुवान, नारायणी, ताम्सालिङ, नेवा:, सुनकोशी, मधेश, किरात, विराट व लिम्बुवान सहित झिंप्यंगू राज्य दुगु प्रस्ताव पेश या:गु ख: ।
अथेहे मेगू प्रस्ताव कथं पूर्वी पहाडय् सृजंगा, तराईलय् सिम्रौनगढ वा जनकपुर, केन्द्रय् सगरमाथा, पश्चिमय् गण्डकी व सुदुर पश्चिमय् कर्णाली, पश्चिम तराईलय् लुम्बिनी (भावर) प्रदेश कथं खुगू राज्य सहितया बैकल्पिक प्रस्ताव या:गु ख: ।
