खराब मौसमया कारणं कृष्णा वीरगंज वनेगु ज्याझ्वः रद्द
मौसम खराबीया कारणं हेलिकप्टर ब्वयेमफेवं नेपाः भ्रमणय् दीम्ह भारतीय विदेशमन्त्री एसएम कृष्णा पूर्व निर्धारित ज्याझ्व: कथं शनिवाः वीरगंज वनेगु ज्याझ्वः रद्द जूगु दु ।
विदेश मन्त्री कृष्णा सीमा सुरक्षा प्रणाली एकीकृत व प्रभावकारी दयेकेत इन्टिग्रेटेड चेकपोस्ट शिलन्यास यायेत शनिवाः वीरगंज झायादीत्यंगु खः । कृष्णा नेपाली सेनाया हेलिकप्टर पाखें सुथय् झिताः इलय् उखे पाखे वनेगु ज्याझ्वः दुगु खः ।
सुथय् येँया मौसम बांलासां वीरगंजया मौसम खराव जुइवं वयेकया वीरगंज वनेगु ज्याझ्वः रद्द यायेमाःगु खः ।
अथेहे भारतीय विदेशमन्त्री कृष्णा व नेपाली कांग्रेसया सभापति गिरिजाप्रसाद कोइराला दथुइ शनिवाः न्हिनय् स्वताः इलय् नापलयेगु ज्याझ्वः दुगु खसां कृष्णा मेगू हे ज्याझ्वलय् व्यस्त जुयादीगुलिं कोइरालाया शनिवाः सनिलय् खुताः इलय् नापलये ज्याझ्वः तय जूगु दु ।
शनिवाः विदेशमन्त्री कृष्णा येँया गौसालाय् दुगु पशुपतिनाथया दर्शन यायेत झायादीगु दु । वयेकलं पशुपतिनाथया दर्शन थम्हं निक्वःगु खुसी यानाःगु कनादिल । अन भारतीय संचारकर्मीतय्त तस्विर कायेब्यूसां नेपाःया संचारकर्मीतय्त धाःसाः तस्बिर कायेमबीवं पत्रकार व संचारकर्मीत दथुइ छझा विवाद नं जूगु खः ।
