भारत नाप प्यंगू सम्झौताय् हस्ताक्षर
उपप्रधानमन्त्री नापं परराष्ट्रमन्त्री सुजाता कोइराला व भारतीय विदेशमन्त्री एसएम कृष्णा दथुइ तराई क्षेत्रय् सतक विस्तार यायेगु सम्झौतय् हस्ताक्षर जूगु दु ।
शुक्रवाः सनिलय् कोइराला व कृष्णा दथुइ सतक विस्तार सम्झौताय् हस्ताक्षर जूगु ख: । अथेहे भारतीय राजदूत राकेश सुद व कार्यवाहक उर्जा सचिव राजेन्द्र कुमार क्षेत्री दथुइ न्यागू जिल्लाया न्यागू गाविसय् ग्रामिण बिद्युतीकरण यायेगु सम्झौताय् हस्ताक्षर जूगु दु ।
अथेहे नेपाः स्टक एक्सचेन्जया अध्यक्ष शंकरमान सिंह व भारतीय सेन्ट्रल हिपोजिटरी सर्भिसया प्रमुख दथुइ सेन्ट्रल डेपोजिटरी एण्ड क्लेयिरङ एण्ड सेटलमेन्ट सिस्टम खडा यायेगु सहमतिपत्रय् नं हस्ताक्षर जूगु दु । नापं नेपाः भारत मैत्री विज्ञान अध्ययन केन्द्र यलया खुमलटारय् पलिस्था यायेगु बारे प्राध्यापक होमनाथ भट्टराई व भारतीय विदेश सचिव निरुपमा राय दथुइ हस्ताक्षर जूगु दु ।
थ्वस्वयां न्ह्यः प्रधानमन्त्री माधवकुमार नेपाल व भारतीय विदेशमन्त्री कृष्णया दथुइ जूगु खँल्हाबंलाय् नेपाःया लोडसेडि म्हो यायेत भारतं ३० मेघावाट आपूर्तीइ ग्वाहालि यायेगु सहमति जूगु खः ।
