भारतं ३० मेगावाट विद्युत आपूर्ति ग्वाहालि याइगु
भारतं नेपाःया लोडसेडिङ म्हो यायेगु निंतिं ३० मेगावाट विद्युत आपूर्तिलय् नेपाःयात ग्वाहालि यायेगु सहमति जूगु दु ।
प्रधानमन्त्री माधवकुमार नेपाल व भारतीय विदेशमन्त्री एसएम कृष्णा दथुइ शुक्रवाः प्रधानमन्त्री निवास बालुवाटारय् जूगु खँल्हाबंलाय् थुगु सहमति जूगु खः । थ्वस्वयां न्ह्यः भारतं २० मेगावाट विद्युत आपूर्तिलय् ग्वाहालि यानावयाच्वंगु खः । तर नेपालं भारतनाप लोडसेडिङ म्हो यायेत थप ३० मेगावाद विद्युत माग याःगु ख: ।
खँल्हाबंलाय् निगू देय् दथुइया आपसी ग्वाहाली व प्रधानमन्त्री नेपाल भारत भ्रमणया इलय् जूगु नीप्यंगू बुँदे सहमतिया कार्यान्वयनया बारे सहलह जूगु खः । नापं वयेकपिं दथुइ बाग्मती सरसफाई व संग्रालय दयेकेगु विषयलय् नं सहमति जूगु दु ।
विदेशमन्त्री कृष्णां नेपाःया शान्ति प्रकृया व संविधान च्वयेगु बारे च्यूताः प्वंकादीगु खसाः प्रधानमन्त्री नेपालं थुगु प्रकृया न्ह्यानाच्वंगु जानकारी बियादिल ।
प्रधानमन्त्री नेपाल नापया खँल्हाबंलाय् विदेशमन्त्री एसएम कृष्णां निगू देय् दथुइया आपसी स्वापू व ससस्याया बारे बृहत रुपं खँल्हाबंला जूगु कनादिल । अथेहे वयेकलं न्हूगु योजना, निगू देय् दथुइया सीमा सुरक्षा थंज्याःगु विषयलय् सहलह जूगु कनादिल ।
