पेजथ्री अवार्ड लःल्हात
रामशेखरयात लाइफ टाइम एचिभमेण्ट
येँ (सन्ध्या टाइम्स)/पेजथ्री बाःछिपौपाखें पेजथ्री नेपालभाषा पिपल्स च्वाइस अवार्ड म्हिगः छगू ज्याझ्वःया दथुइ नेपालभाषा संकिपा व संगीत ख्यःया थीथी विधाय् उत्कृष्ट जूपिंत लःल्हात ।
पेजथ्री बाःछिपौया सम्पादक दर्शनवीर शाक्यया लसकुस न्वचु लिसें संयुक्ता शर्मा राजोपाध्यायया कुमारी हुलाप्याखनं ज्याझ्वः न्ह्याःगु खः ।
ज्याझ्वलय् न्यय्न्यादँ न्ह्यःनिसें नेपालभाषा प्याखं व नाटक साहित्य च्वन्ह्याकेत सक्रिय कलाकार व निर्देशक रामशेखर नकःमियात जीवंकाःछि योगदान (लाइफ टाइम एचिभमेण्ट) अवार्ड लःल्हाःगु खः। वय्कःयात भाजु धर्मवीर शाक्यं दोसल्लां न्ययेकादीगु खःसा ईलोहं प्रकाशनया प्रबन्ध सम्पादक नरेशवीर शाक्यं हनापौया लिसें प्रकाशनया सकलें दुजःपिंसं खादां क्वखायेकादीगु खः ।
अवार्ड ज्याझ्वलय् सर्वाकृष्ट संकिपा जुइत ताःलाःगु 'सर्गः मिलां' थीथी विधाय् प्यंगू अवार्ड त्याकूगु दु। ज्याझ्वलय् फुक्कं विधाय् यानाः २६ म्ह कलाकर्मीयात सिरपाः बिउगु खः
।
ज्याझ्वलय् सिरपाः त्याकादीपिंत संस्कृतिविद् सत्यमोहन जोशीया लिसें वरिष्ठ गायकपिं प्रेमध्वज प्रधान, योगेश वैद्य, भृगुराम श्रेष्ठ, गौरीशंकर धुँजु, राजभाई सुवाल, सुरेश प्रधान, आर.के मानन्धर, सुजीव वज्राचार्यपिंसं अवार्ड लःल्हानादीगु खः ।
