मोबाइल चार्ज घण्टां सछि !
येँ (सन्ध्या टाइम्स)/ नेपाःया अति व्यस्त पर्यटकीय क्षेत्र कथं नांजाःगु नाम्चेय् मोबाइल फोन १ घण्टा चार्ज यायेत १०० तका पुलेमाः ।
न्यनेबलय् अजूचायापु तर नाम्चे चाःहिउ वइपिं पर्यटकतय् लागिं थ्व सामान्य खँ खः ।
नाम्चे तसकं उचाईलय् थाःगु थाय् जूगुलिं ख्वाउँसे च्वं। उकिं मोबाइल फोन नं याकनं याकनं हे चार्ज याये मालीगु। तर चार्ज यायेगु भाः धाःसा थिके। खतुं नाम्चे हरेक हे सामानया भाः थिकेगु पर्यटकीय लागा खः ।
लँया ल्याखं स्वयेगु खःसा नाम्चे तसकं विकट गां खः। तर अन ति विद्युतया बांलाःगु प्रणाली राजधानी धाःगु येँ देशय् नं मदु ।
नाम्चेय् करिब सत्या ति छेँखा दु। फुक्क हे छेँय् विद्युत नं दु। तर फुक्क हे छेँय् विद्युत दुसां येँय् थें विद्युतया तार धाःसा गनं हे खने मदु। विद्युत प्रणालीयात पूर्ण रुपं हे भूमिगत याना तःगु खः। बँया तलं तलं तार यंकाः छेँखा छेँखाय् जुका तःगु खः ।
नाम्चेवासीतय्सं थ्व विद्युत नं थःपिंसं हे उत्पादन यानातःगु खः। नेपाःया विद्युत प्राधिकरणलिसे थुकिया छुं हे स्वापू मदु। नाम्चे लागाया स्थानीय जनता मिले जुयाः अन हे च्वंगु खुसिपाखें चिचीधंगु स्केलया थीथी जलविद्युत परियोजनात सञ्चालन याना तःगु दु। थःगु हे गामय् विद्युत परियोजना दुगुलिं अन लोडशेडिङ्ग नं गबलें हे मजू। येँय् न्हिं १२ घण्टा पूरा हे मत मवइगु इलय् नं अन सुथय् घौछि व बहनी घौछि हिटर, गिजर आदि जक चले याये मजीक सामान्य 'लोडशेडिङ्ग' जुइ। उगु इलय् नं मत धाःसा न्ह्याक्व नं च्याइ।
स्थानीय मनूतय्सं मतया ध्यबा वहे विद्युत परियोजना व्यवस्थापनयात पुली। खुम्बु लागाय् आपालं झ्वाःलः दुगुलिं अन मत पिकायेत नं खास हे थाकु मजू ।
