१९५०या सन्धि पुनरावलोकन यायेत भारत तयार
एनेकपा (माओवादीं) भारत नाप जूगु असमान सन्धि पुनरावलोकया माग सहित राष्ट्रिय स्वाधिनताया रक्षायात मू नारा दयेकाः प्यंगूगु चरणया आन्दोलन यानाच्वंगु इलय् भारतं नेपाः नाप जूगु असमान सन्धि पुनरावलोकन यायेत लचकता क्यंगु दु ।
शुक्रवाः जक नेपाः भ्रमणय् झायादीम्ह भारतीय विदेशमन्त्री एसएम कृष्णां सन् १९५०या नेपाः भारत शान्ति व मैत्री सन्धि पुनरावलोकन यायेत तयार जूगु खँ धयादीगु दु । उपप्रधानमन्त्री नापं परराष्ट्रमन्त्री सुजाता कोइराला नापया खँल्हाबंला वयेकलं थज्यांगु खँ धयादीगु खः ।
येँया बत्तीसपुतली दुगु होटल द्वारिकाजय् जूगु खँल्हाबंला लिपाः उपप्रम कोइरालां सन् १९५०या सन्धि लिपाः निगूलिं देशय् यक्व परिवर्तन जुइधुंकूगुलिं उकीयात पुनरावलोकन यायेमाःगु खँ निगूलिं पक्षं खँल्हाबंलाया झ्वलय् तःगु कनादिल ।
अथेहे खँल्हाबंलाय सुपर्दगी सन्धिया बारे नं सहलह यायेत सहमति जूगु दु । नेपाःया भूमि जुयाः आतंककारीतय्सं भारत विरोधी गतिविधि संचालन यानाच्वंगु धासें भारतं न्हूगु सुपुर्दगी सन्धिया प्रस्ताव यानावयाच्वंगु दु । मन्त्री कोइरालं थुकीया बारे तत्काल सहलह यायेगु नं सहमति जूगु कनादिल ।
वयेकलं भारतीय पक्षं न्हापा निसें ल्ह्वना च्वंगु सीमा सुरक्षा व सीमाय् जुइगु भारत विरोधी गतिविधि नियन्त्रण, नक्कली भारतीय नोटया कारोबार नियन्त्रण व सीमा नक्शाया बारे हस्ताक्षर यायेगु बारे नं खँल्हाबंला जूगु धयादिल ।
भारतीय विदेश मन्त्री कृष्णां राष्ट्रपति डा. रामवरण यादव, प्रधानमन्त्री माधवकुमार नेपाल, उपप्रधानमन्त्री विजयकुमार गच्छदार, गृहमन्त्री भीम रावल, रक्षामन्त्री विद्या भण्डारी, कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड' व एमाले नेता केपी शर्मा ओली नाप नं खँल्हाबंला याइगु ज्याझ्वः दु ।
