शान्ति प्रकृया प्रति इयु राजदुततय् च्यूताः
संविधान निर्माण व शान्ति प्रकृयाय् खनेदुगु गतिरोधया सम्बन्धय् युरोपेली युनियनया राजदूतय्सं च्यूताः प्वंकूगु दु ।
नेपाली कांग्रेसया सभापित गिरिजाप्रसाद कोइराला नाप शुक्रवाः सुथय् खँल्हाबंला यानादिसें वयेकपिंसं थज्याःगु च्यूताः प्वंकादीगु खः । अथेहे खँल्हाबंलाय् राष्ट्रसंघया महासचिव वान की मुनं पेश यानादीगु प्रतिवेदनया बारे नं सहलह जूगु खः ।
खँल्हाबंलाय् राजनीतिक गतिरोध चीकेत प्रमुख स्वंगू दल दथुइ गठन जूगु उच्चस्तरीय राजनीतिक संयन्त्रया संयोजकय् कोइराला च्वनादीगुलिं राजदूततय्सं भिंतुना ब्यूसें थुकीं शान्ति प्रकृयायात बिना गतिरोध पूवंकेत ग्वाहालि याइगु विश्वास प्वंकूगु ख: ।
बेलायत, डेनमार्क, जर्मन, फ्रान्स व बेल्जियमया राजदूतत नापया खँल्हाबंलाय् कोइरालां न्हूगु संविधान इलय् हे जुइगु व शान्ति प्रकृया नं याकनं क्वचाइगु धयादिल । अथेहे वयेकलं राजनीतिक गतिरोध चीकेत संयन्त्रं प्रभावकारी भुमिका म्हितिगु बारे नं राजदूततय्त कनादिल ।
