बारय् अध्यक्ष सहित लोकतान्त्रिक प्यानल त्यात
कानुनी राज्य व विधिया शासन पक्षया विजय : खड्का
कानुन व्यवसायीतय् मंकाः संगठन नेपाल बार एसोसिएसनय् अध्यक्ष प्रेमबहादुर खड्का सहितया पुचः त्याःगु दु । अध्यक्ष पदय् खड्कां पेसागत प्रगतिशीलया उम्मेदवार स्वयां प्यसः मत अप्व हयाः निर्वाचित जुयादीगु खः ।
झिदँ लिपाः लोकतान्त्रिक पक्षधरं बारया अध्यक्ष पद त्याकूगु थ्व न्हापांगु खुसी खः । थ्वस्वयां न्ह्य: २०५७ सालय् लोकतान्त्रिक पक्षधर हरिहर दाहाल अध्यक्ष पदय् निर्वाचित जुयादीगु खः ।
बिहीवाः सनिलय् सिधःगु मतगणनाय् कांग्रेस निकट लोकतान्त्रिकया खड्कां २५६६ मत हःगु खसाः एमाले निकट पेसागत प्रगतिशीलया हरिकृष्ण कार्कीं २१४५ मत व माओवादी निकट गणतान्त्रिकया रामनाथ मैनालीं ९५२ मत हःगु खः ।
नवनिर्वाचित अध्यक्ष खड्कां न्यायालय दुनेया विकृति व विसंगी चीकेगु थ:गु न्हापांगु प्राथमिकता जूगु कनादिल । वयेकलं लोकतन्त्रया स्थापना, कानुनी राज्य व विधिया शासन पक्षय् थ:गु विजय जूगु दाबी यानादिल ।
अथेहे बारया महासचिवय् नं लोकतान्त्रि पक्षधर विजयप्रसाद मिश्र २६९५ मत हयाः निर्वाचित जुयादीगु दु । वयेकया निकटम प्रतिद्वन्द्वी पेसागत प्रगतिशीलया हरि फूयाँलं २१५६ मत व गणतान्त्रिकया श्यामकाजी प्रधानं ८२९ मत हःगु खः ।
बारया नीनिक्वःगु कार्यसमिति निर्वाचनय् लोकतान्त्रिक उम्मेदवारत झिन्हय्गुलिं सिटय् निर्वाचित जूगु दु । लोकतान्त्रिक प्यानलया पदाधिकारीत दक्वं पदय् निर्वाचित जूगु बारया इतिहासय् थ्व न्हापांगु पटक ख: ।
मत परिणम कथं पूर्वाचल उपाध्यक्षय् सीताराम राई २६२६, मध्यमाञ्चलय् सुरेन्द्रकुमार महत्तो २४६६, पश्चिमाञ्चलय् गोपालप्रसाद पाण्डे २७००, मध्यपश्भिमाञ्चलय् गोकर्ण डाँगी २५७३ व सुदुरपश्चिमाञ्चलय् जोहारीलाला चौधरी २६९४ मत प्राप्त यानाः निर्वाचित जुयादीगु दु ।
अथेहे कोषाध्यक्षय् नं लोकतान्त्रिक पक्षधर युवराजकुमार भण्डारी २६०१ सहित निर्वाचित जुयादीगु दु । दुजलय् ठाकुरप्रसाद न्यौपाने, गोपालकृष्ण घिमिरे, योगेन्द्र बहादुर अधिकारी, अनिता जोसी मानन्धर, विवेकराज ढुंगेल, शान्ता सेढाईं सापकोटा, सतिशकुमार झा, उद्धवचन्द्र घिमिरे व मनोहर निर्वाचित जूगु दु ।
शनिवाः क्वचाःगु निर्वाचनय् ५९२२ पदाधिकारीतय्सं मतदान याःगु खःसाः निर्वाचनया मतगणना मंगलवाः निसें शुरु जूगु खः ।
