तमलोपा सरकार प्रति असन्तुष्ट
सत्तारुढ तराई मधेश लोकतान्त्रिक पार्टीं सरकारया कार्यशैली प्रति असन्तुष्टि प्वंकूगु दु । नापं उगु पार्टीं संविधानसभा पाखें मधेशया मुद्दा सम्बोधन जुइमफुसाः आन्दोलनय् वनेत बाध्य जुइगु ख्याच्वः ब्यूगु दु ।
तमलोपा केन्द्रीय कार्यसमितिया बैठकं याःगु निर्णय सार्वजनिक यायेत बिहीवाः येँ ग्वसाःग्वःगु पत्रकार सम्मेलनय् पार्टी अध्यक्ष महन्थ ठाकुरं मधेशया मुद्दा सम्बोधन यायेत सरकारं पर्याप्त ज्या मयाःगु द्वपं बियादिल । वयेकलं मधेशया मुद्दा सम्बोधन याकेत थःगु पार्टीं पहल जारी तयेगु नं धयादिल ।
पत्रकार सम्मेलनय् पार्टी महामन्त्री सर्वेन्द्रनाथ शुक्लां आन्दोलन पाखें गठित पार्टी जूगुलिं मधेशया माग पूमवंसाः हानं आन्दोलनय् वनेफइगु बिचाः प्वंकादिल ।
तमलोपां २०६३ फागुन १६ गते मंकाः लोकतान्त्रिक मधेशी मोर्चा नाप जूगु सम्झौता पूवंकेत सरकार नाप माग याःगु दु । अथेहे संविधान च्वयेगु ज्याय् व सेना समायोजनया मू लक्ष्यायात वेवास्ता यानाः सत्ताया कासाय् प्रमुख स्वंगू दल लगेजूगुलिं निर्धारित इलय् संविधान निर्माण मजुइगु सम्भावना अप्वयावंगु खँ धाःगु दु ।
पार्टीया केन्द्रय समितिया बैठकय् अधिकांश दुजःतय्सं पार्टीया भूमिका प्रभावकारी मजूगु प्रति असन्तुष्टि प्वंकूगु खँ नं पत्रकार सम्मेलनय् जानकारी ब्यूगु ख: ।
