प्रधानमन्त्रीयात संयन्त्रय् तयेत माओवादी सहमत
नेपाली कांग्रेसया सभापति गिरिजाप्रसाद कोइरालाया संयोजकत्वय् गठन जूगु उच्चसतरीय राजनीतिक संयन्त्रय् प्रधानमन्त्रीयात नं तयेत एनेकपा (माओवादी) सहमत जूगु दु ।
बिहीवाः सुथय् कोइराला निवास महाराजगंजय् संयन्त्र संयोजक कोइराला व माओवादी अध्यक्ष पुष्पकमल दाहाल 'प्रचण्ड' दथुइ जूगु खँल्हाबंलाय् प्रचण्डं प्रधानमन्त्रीयात नं संयन्त्रय् तयेत सहमति प्वंकूगु खः ।
संयन्त्रय् प्रधानमन्त्रीया आवश्यक्ता मदुगु अभिव्यक्ति बियादीम्ह माओवादी अध्यक्ष प्रचण्डं कोइराला नापया खँल्हाबंलाय् पूर्व अडान परिवर्तन यानाः सहमतिलय् वःगु खँ खँल्हाबंलाय् नापं दीम्ह कांग्रेस केन्द्रीय दुजः कृष्णप्रसाद कोइरालां कनादिल ।
थ्वस्वयां न्ह्यः बुधवाः कोइराला व नेकपा (एमाले)या अध्यक्ष झलनाथ खनाल दथुइ जूगु खँल्हाबंलाय् प्रधानमन्त्रीयात संयन्त्रय् आमन्त्रित दुजः कथं तयेगु सहमति जूगु खः ।
छवाः न्ह्यः कोइराला संयोजकत्वय् प्रचण्ड व खनाल दुजः दुगु संयन्त्र गठन याःगु खः । उगु संयन्त्रयात प्रधानमन्त्री लगायात प्रमुख दलया शीर्ष नेतात पाखें हे थुकीया कार्यक्षेत्र, समयावधी, अधिकार आदिया बारे न्ह्यस थंसें विरोध याःगु खः ।
