शान्ति प्रकृया भंग जुइफुगु पाखे राष्ट्रसंघया च्यूताः
राष्ट्रसंघं नेपाःया राजनीतिक दलत दथुइ ताः ई निसें खनेदुगु असहमतिया कारणं शान्ति प्रकृया भंग जुइफुगु खतरा अप्वया वनाच्वंगु धासें च्यूताः प्वंकूगु दु ।
बुधवाः बहनी न्यूयोर्कय् राष्ट्रसंघीय महासचिव वान कि मुनं नेपाः सम्बन्धी पेश यानादीगु प्रतिवेदनय् उगु खँ न्ह्यथंनातःगु खः । प्रतिवेदनय् सरकार, प्रतिपक्ष एनेकपा (माओवादी) व नेपाली सेना दथुइ तनाव व अविश्वास दुगु धासें उकीं शान्ति प्रकृया उल्लेख्य रुपं ठप्प जूगु खँयात प्रमुखताया साथ न्ह्यथंगु दु ।
नेपालय् शान्ति प्रकृयाय् लिप्पांगु स्वलाय् जूगु गतिविधिया समिक्षा सहित तयार याःगु उगु प्रतिवेदनय् महासचिव वानं महत्वपूर्ण राजनीतिक मामिलाय् दलत दुनेया कट्टरपन्थी धार हावी जूगु विष्लेषण यानातःगु दु । अज्याःगु धार हावी जुया शान्ति व प्रजातन्त्रिक पथया मध्यमार्गी लँपूपाखें राजनीतिक दिशा परिवर्तन जुइफुगु पाखे च्यूताः प्वंकूगु दु ।
अथेहे महासचिव बानं राष्ट्रसंघीय सुरक्षा परिषद्यय् न्ह्यब्वःगु प्रतिवेदनय् नेपाः सरकारया इनाप कथं अनिमिनया म्याद थप यायेत इनाप यानादीगु दु । वइगु माघ ९ गते अनमिनया म्याद फुइत्यंगुलिं सरकारं थप प्यलाया निंतिं म्याद थप यायेत राष्ट्रयात पौ छ्वःगु खः ।
