मधेश बन्दया कारण जनजीवन प्रभावित
बाराय् थःगु पार्टी कार्यकार्ता हत्याया विरोधय् एनेकपा (माओवदीं) बिहीवाः आह्वान याःगु मधेश बन्द न्हिनय् निता: इलंनिसें लितका:गु दु । माओवादी केन्द्रीय दुज: किसन शर्मां छगू विज्ञप्ती पिथना थारुतय् नख: व कन्हय् निसें त्रिवेणीय् शुरु जुइगु मेलायात मध्यनजर याना: बन्द लितका:गु खँ धा:गु दु
वस्यां न्ह्य: मधेश बन्दया कारणं पूर्व-पश्चिम राजमार्गया यातायात प्रभावित जूगु ख:। माओवादी कार्यकर्तातय्सं अपराधीयात कारवाहीया माग यासें सुथंनिसें मधेशया थीथी थासय् विरोध प्रदर्शन या:गु ख: ।
बन्दं कपिलवस्तुया सदरमुकाम तौलिहवा, प्रमुख व्यापारिक केन्द्र कृष्णनगर, गोरुसिंगे, चन्द्रौटा लगायतया बजाः बन्द जूगु खसा: सुथंनिसें अन सवारीसाधन नं चलेमजू ।
अथेहे पश्चिमाञ्चलया प्रमुख बजाः बुटवल व नापसं लागाया जनजीवन बन्दया कारणं प्रभावित जूगु दु । पूर्वपश्चिम व सिद्धार्थ लोकमार्गय् चलेजुइगु व ताःहाकःगु दुरीया सवारी साधन चलेजुइफुगु मदु । माओवादी बन्दं बुटवलया बजाः उद्योग कलकारखाना आदि दक्वं ठप्प जूगु दु ।
मंगलवाः बहनी बाराय् माओवादी भोजपुरा राज्य समितिया दुजः राजेश मण्डलयात मोटरसाइकलय् वःगु अज्ञात पुचलं गोलीं क्यकाः स्याःगु खः । मण्डलया छ्योनय् गोलीं लायेवं घटनास्थलय् मदुगु खः ।
