पूर्वय् नं संघीयता विरोधीतय् बन्दया सशक्त प्रतिकार
धरानय् बन्दकर्ता छम्ह नं सतकय् कुहांमवः
संविधानय् दुथ्याःगु संघीय व्यवस्थाया विरुद्ध राष्ट्रिय जनमोर्चां याःगु पूर्वया झिंखुगू जिल्ला बन्दया लिच्वः आशिंक जक लाःगु दु । बन्दया विरोधय् लिम्बु व खुम्बुवान संस्थातय्सं जुलुस, विरोध सभा व मोटर र्याली सहित प्रतिकार याःगु खः ।
बन्दया कारणं पूर्वया आपलं जिल्लाय् सुथय् मूमू सतकय् गाडी चलेमजूगु खसां दुनेया सतकया प्राय दक्वं पसः निर्वाध रुपं संचान जुयाच्वंगु खः । अथेहे दुने दुनेया सकतय् सवारी साधानं चलेजूगु खः । बन्दया विरोधय् मंकाः लिम्बुवान मोर्चा व खुम्बुवान मोर्चां सुथं निसें थीथी थासं जुलुस पिकाःगु खः । नापं स्थानीय यातायात चलेयायेत व व्यवसायीतय्त थःगु उद्योग व्यापार संचालन यायेत इनाप याःगु खः ।
स्वन्हू न्ह्यः जनमोर्चाया स्वम्ह जक कार्यकर्तां धरानय् बन्दया प्रचार याःगु खसां बन्दया न्हि खुन्हु धाःसाः छम्ह नं बन्दकर्ता मखंगु खँ मंकाः लिम्बुवान मोर्चां धाःगु दु ।
बुधवाः हे लिम्बुवान मोर्चां धरानय् छगू वृहत विरोध सभाया ग्वसाःग्वःगु दु । उगु विरोध सभाय् न्ववापिंसं संघीयताया विरोध याइपिं न्ह्याःगु पार्टीया जुसां लिनाछ्वयेगु ख्याच्वः ब्यूगु दु । विरोध सभाय् माओवादीया लिम्बुवान राष्ट्रिय मुक्ति मोर्चाया अध्यक्ष श्रीप्रसाद जवेगुले, कांग्रेस नेपाल लिम्बु संघया केन्द्रीय अध्यक्ष प्रविण नेम्वाङ, किराँत याक्थुङ चुम्लुङया केन्द्रीय महासचिव योगराज वनेमले, लिम्बुवान प्रान्तिय परिषदया अध्यक्ष केपी पालुङ्वां संघीयताया विरोध याइपिंत सरकारं कारवाही यायेमाःगु खँय् बः बियादिल ।
अथेहे बन्दया विरोधय् लिम्बुवान मंकाः मोर्चां इटहरीलय् मोटरसाइकल र्याली यासें बन्दया प्रतिकार याःगु खः ।
