झिंखुक्वःगु सूचना प्रविधि मेला शुरु
झिंखुक्वःगु सूचना प्रविधि मेला - 'क्यान ईन्फोटेक २०११' बुधवाः निसें येँ शुरु जूगु दु । प्यन्हू तक न्ह्याइगु उगु मेलाया उल्लेज्या प्रधानमन्त्री माधवकुमार नेपालं यानादीगु खः ।
येँया भृकुटी मण्डपय् शुरु जूगु मेलाय उल्लेज्या यानादिसें प्रधानमन्त्री माधवकुमार नेपालं थुगु मेलां नेपाःया सूचना प्रविधिया विकासय् महत्वपूर्ण योगदान यायेत ग्वाहालु जुइगु धयादिल । वयेकलं नेपालं सूचना प्रविधिया क्षेत्रय् धाः कथं प्रगति यायेमफुगु धयादिसें सरकार थुगु क्षेत्रया विकासया निंतिं ग्वाहालि यायेत तयार जूगु धयादिल ।
मेलाय् सूचना प्रविधि सम्बन्धी राष्ट्रिय व अर्न्तराष्ट्रिय यानाः निसःगू स्टल दुगु खँ ग्वसाः खलः कम्यूटर एसोसिएसन अफ नेपाल (क्यानं) धाःगु दु । उगु मेलाय् कम्यूटर, ल्यापटप, मोवाइल, आई फोन, सेक्यूरेटि सिस्टम आदिया स्टल दु ।
अथेहे मेलाय् सूचना प्रविधिया क्षेत्रय् विकास जूगु न्हूगु न्हूगु प्रविधिया स्टल व उकीया बारे जानकारी बीगु नापं मीगु खँ धाःगु दु । मेलाय् साधारण शुल्क न्यय्तकाः व विद्यार्थी शुल्क स्वीतक जूगु खँ नं ग्वसाः खलकं धाःगु दु ।
