लिम्बु व खम्बुपाखें बन्दया प्रतिकार
येँ (सन्ध्या टाइम्स)/संघीयता विरुद्ध राष्ट्रिय जनमोर्चां थौं पूर्वाञ्चल बन्द आह्वान याःगुयात लिम्बु व खम्बुवानतय्सं सशक्त कथं प्रतिकार याःगु हुनिं बन्द आह्वानकर्तात सतकय् हे पिहां वये फयाच्वंगु मदु। लिम्बुवान व खम्बुवान स्वायत्त राज्यया माग याना वयाच्वंगु थीथी जातीय खलः पुचःतय्सं प्रतिकार समिति हे दयेकाः उगु कथं प्रतिकार याःगु खःसा म्हिगः थाय् थासय् प्रतिकार जुलुस तकं पिकाःगु खः ।
संघीयताया विरोध धइगु संविधान विरोधीत खः उकिं सरकारं नियन्त्रण यायेमाल मखुसा थःपिंसं हे नियन्त्रण यायेमाली धकाः संघीयता पक्षधर जातीय खलः पुचःतय्सं स्थानिय प्रशासनयात धाःगु हुनिं प्रहरीं नं संघीयता विरोधितय्त प्रदर्शन याके मबिउगु खः धकाः धाःगु दु। थ्व हे झ्वलय् थौं प्रदर्शन यायेत धकाः वःपिं जनमोर्चाया केन्द्रीय दुजः सुरेन्द्र केसी नापं न्याम्ह खुम्ह कार्यकर्तातय्त प्रहरीं ज्वना सुरक्षित थासय् तयाःतःगु दु। अनया जातीय खलः पुचःतय्सं इमित आक्रमण यायेफुगु अवस्थायात ध्यानय् तयाः जनमोर्चाया कार्यकर्तातय्त प्रहरी प्रशासनं हे सुरक्षित थासय् तयातःगु खः धकाः धाःगु दु ।
पूर्वाञ्चल धुंकाः गुगू जिल्ला बन्द आह्वानकर्तातय्त मात्तु मालेगु ज्या थौं सुथंनिसें हे लिम्बुवान भोलिन्टयर्सतय्सं यानाच्वंगु दु धकाः संघीय लोकतान्त्रिक राष्ट्रिय मञ्चया महासचिव खगेन्द्र माखेमं 'सन्ध्या टाइम्स'यात धयादीगु दु। बन्द आह्वान यानातःगु हुनिं मनूतय्सं ग्यानाः गाडी चले मयाःसां बजार धाःसा पूरा हे चालाच्वंगु दु धकाः वय्कलं जानकारी बियादीगु दु ।
