भद्रकाली द्यःछेँ जीर्णोद्धार
कलिगत संवत् ३८२५ (वि.सं. ७८१ सालपाखे) लिच्छवी जुजु गुणकामदेवया पालय् थन हयाः स्थापना यानातःगु धयातःगु श्री लुमधि भद्रकाली द्यःछेँया जीर्णोद्धार ज्या शुरु जूगु दु। नांजाःम्ह पण्डित बद्रीरत्न बज्राचार्यं परम्परागत विधि कथं पुजा यासें संस्कृति मन्त्री मिनेन्द्र रिजालं सोमवाः उगु द्यःछेँया जीर्णोद्धार ज्या न्ह्याकादीगु खः। संस्कृति मन्त्री स्वयमं उकिया जग स्वनाः ज्या आरम्भ यानादीगु खः।
द्यःछेँ जीर्णोद्धारया लागिं स्थानीय जनतापाखें चन्द कायेगु ज्या जुयाच्वंसां आः तक सरकारपाखें धाःसा ग्वाहालि वःगु मदुनि। अथेसां भविष्यय् ग्वाहालि चूलाइगु आशा कयातःगु दु ।
छगू करोड चाःचू खर्च जुइगु उगु देगः जीर्णोद्धारया ज्याय् आः तक ३९ लाख तका मुंकेधुंकूगु दु। २०६० सालय् ८८ लाखं द्यःछेँ तयार याये फइ कथं इष्टिमेट याःगु खः। तर आः फुक्कं सामानया भाः थहां वनेधुकूगुलिं इष्टिमेट नं अप्वया वनाच्वंगु दु। स्थानीय निबासी रमेशमान तुलाधरं छगू करोड चाःचू खर्च जुइगु अनुमान सहितया इष्टिमेट तयार यानादीगु खः। उकिया लागिं थीथी थासं थीथी कथं चन्दा म्हयेगु ज्या धाःसा तीब्र ढंगं न्ह्यानाच्वंगु दनि ।
पाहांचःर्हेबलय् तिंख्यः व असनय् जात्रा यानाः चाहीकेमाःम्ह लुँमधि अजिमाया द्यःछेँ ताःई निसें जीर्णोद्धारया अभावय् अथें लानाच्वंगुलिं पूरा दां मुके न्ह्यः हे ज्या न्ह्याका छ्वःगु खः। ज्या न्ह्याकेगु निंतिं न्यादँ खुदँ न्ह्यः हे अन श्री लुँमधि भद्रकाली द्यःछेँ जीर्णोद्धार तथा संरक्षण संस्था चायेकूगु खः। चन्दा म्हयेगु झ्वलय् आः तक संस्थायात येँ मनपापाखें ४ लाख तका दां दुहां वःगु दु। अथेहे गुथि संस्थानपाखें छगू लाख तका बिउगु दु। सभासद् तीर्थराम डंगोलया सांसद कोषपाखें स्वंगू लाख तका दां तया बिउगु दुसा मेमेपिं सभासद्पाखें नं दां कायेगु पहल जुयाच्वंगु दु ।
थौंकन्हय् मंगलमान सिन्दुराकारया नेतृत्वय् थीथी कथं सिँया ज्या न्ह्यानाच्वंगु दु। अथेहे प्राविधिक रमेशमान तुलाधरं नं ज्या याइपिंत अःपुकेगु निंतिं थीथी कथं आर्किटेक डिजाइनत यानाच्वनादीगु दु। फयां फति म्हो लागतं जीर्णोद्धारया नक्सा तयार यायेगु निंतिं तुलाधरया डी. एल. कन्ट्रक्सन कम्पनी लगे जुयाच्वंगु दु। थथे हरेक पक्षं ग्वाहालि चूलाना च्वंगुलिं नं आः तक गुलि खर्च वनेमाःगु खः, उलि मवँसे खर्च बचे नं जुयाच्वंगु दु। आः तक १७ लाख तका ति जक खर्च वनेधुंकूगु खँ जीर्णोद्धार तथा संरक्षण संस्थां धाःगु दु। झिंन्याम्हेसिया उगु संस्थाया नेतृत्व यानादीम्ह अध्यक्ष अष्टमान महर्जन न्हियान्हिथं थःगु ब्यक्तिगत ज्या त्वःताः अन जुयाच्वंगु गतिविधिइ थः हे सरिक जुया च्वनादीगु दु। नापं आर्थिक व प्राविधिक टोलीयात निरन्तर निर्देशन नं बीगु याना च्वनादीगु दु ।
सांस्कृतिक, ऐतिहासिक रुपं अतिकं महत्वपूर्ण थ्व द्यःछेँ जीर्णोद्धार सिधल कि थुकिं तेबाहाःया ख्वाःपाः हे हिलीगु आशा नं यानातःगु दु ।
