संयन्त्रय् प्रधानमन्त्री स्थायी आमन्त्रित दुजः
नेपाली कांग्रेसया सभापति गिरिजाप्रसाद कोइराला व नेकपा (एमाले)या अध्यक्ष झलनाथ खनाल दथुइ उच्चस्तरीय राजनीतिक संयन्त्रय् प्रधानमन्त्रीयात स्थायी आमन्त्रित दुजः कथं तयेगु सहमति जूगु दु ।
संयन्त्रया कार्यक्षेध व विस्तारया बारे नेतातय्सं न्ह्यसः तयाच्वंगु इलय् कोइराला व खनाल दथुइ बुधवाः च्वंगु बैठकं थंज्याःगु निर्णय याःगु खः । कोइराला निवास महाराजगंजय् जूगु खँल्हाबंलाय् वइगु वालय् संयन्त्रया बैठक सःतेगु नं सहमति जूगु दु ।
खँल्हाबंला लिपाः एमाले अध्यक्ष खनालं संयन्त्रय् मेमेगू दलयात नं दुथ्याकेगु बारे सहलह जूगु कनादिल । वयेकलं दलतय्सं संयन्त्रया बारे प्वंकूगु असन्तुष्टियात नं चीकामाः धयादिल ।
नेपाली कांग्रेसया सभापति कोइरालाय संयोजकत्वय् गठित संयन्त्रय् माओवादी अध्यक्ष पुष्पकमल दाहाल 'प्रचण्ड' व एमाले अध्यक्ष खनाल दुज: कथं दी । उगु संयन्त्रयात कांग्रेस, एमाले, मधेशी जनअधिकार फोरम, तराई-मधेश लोकतान्त्रिक पार्टी लगायत पार्टी नेतातय्सं हे संयन्त्रया बारे न्ह्यसः थंसें विरोध याःगु खः । नापं माओवादी अध्यक्ष प्रचण्डं संयन्त्रय् प्रधानमन्त्रीयात दुथ्याकेम्वा:गु अभिव्यक्ति बियादीगु ख: ।
