हाइटीलय् शक्तिशाली भुखाय् ब्वल, छम्ह नेपाःमि घाःपाः
उत्तर अमेरिकी महादेशया क्यारेबियन क्षेत्रय् लागू हाइटीलय् मंगलवाः बहनी शक्तिशाली भुखाय् ब्वःगु दु । ७ दशमलव ३ रेक्टर स्केलया शक्तिशाली भुखाय् पाखें सच्छिं मल्याक्क मनूत सीगु दुसाः छम्ह नेपाःमि नापं आपलं घाःपाः जूगु दु ।
अन राष्ट्रसंघीय शान्ति मिसनय् कार्यरत छम्ह नेपाली सैनिकया तुती प्रयाक्चर जूगु धाःसां घाःपाः जुम्ह सैनिकया नां सिकेफुगु मदुनी ।
भुख्याय् ब्वयाः हाइटीया राजधानी पोर्ट ओ प्रिन्सया मध्य भागय् तःधंगु विनाश जूगु दु । अन दुगु राष्ट्रपतिया निवास, संयुक्त राष्ट्र संघया शान्ति मिसनया ज्याकू व अस्पतालय् नं क्षति लागू दु । भुखाय्या केन्द्र राजधानी स्वयां झिंन्यागू किलोमिटर दक्षिणपश्चिमय् जूगुलिं राजधानीलय् अत्याधिक क्षति जूगु खः ।
स्थानीय ई कथं सनिलय्या ४:५३ बजे दकलय् न्हापां ७ दशमलव ३ रेक्टर स्केलया भुखाय् ब्वःगु खःसा लिपाः ७ दशमलव ९ व ७ दशमलव ५ रेक्टर स्केलया याना हानं निक्वः भुखाय् ब्वःगु खः ।
