शासकीय स्वरुपय् स्वंगूलि प्रस्ताव समानान्तर रुपं दुथ्याकीगु
संविधानसभाया शासकीय स्वरुप निर्धारण समितिं निर्वाचन प्रकृयां बहुमत खाकेमफुगु शासन प्रणली व निर्वाचन पद्धति सम्बन्धि स्वंगूलिं प्रस्तावयात समानान्तर प्रस्तावया रुपय् संविधानया प्रारम्भिक मस्यौदाय् दुथ्याकेगु निर्णय मंगलवाः च्वंगु समितिया बैठकं याःगु दु ।
शासकीय स्वरुपया प्रस्ताव कथं माओवादीं प्रत्यक्ष निर्वाचित कार्यकारी राष्ट्रपति, कांग्रेस व एमालें संसदपाखें चयन जुइगु कार्यकारी प्रधानमन्त्री व तराई मधेश लोकतान्त्रिक पार्टीं संसदपाखें निर्वाचित कार्यकारी राष्ट्रपतिया प्रस्ताव याःगु खः ।
अथेहे निर्वाचन पद्धतिया प्रस्तावय् माओवदीं बहुसदस्यीय प्रत्यक्ष समानुपातिक निर्वाचन प्रणाली, कांग्रेस-एमालें क्षतिपूर्ति सहितया मिश्रत सदस्यीय समानुपातिक चुनाव पद्धति व तमलोपां क्वयेया सदनय् प्रत्यक्ष व च्वयखया सदनय् पूर्ण समानुपातिक निर्वाचन प्रणलीया प्रस्ताव याःगु खः ।
प्रस्तावया बारे वंगु मंसिर १६य् समिति दुने जूगु मतदानय् माओवादी, कांग्रेस-एमाले व तमलोपां तःगु स्वंगुलिं बिस्कं बिस्कं प्रस्तावय् सुनां नं स्पष्ट बहुमत ह्येमफुगु खः । माओवादीया प्रस्तावय् झिंच्यागू मत पक्षय् व नीगू मत विपक्षय्, कांग्रेस-एमालेया प्रस्तावय् झिंखुगू मत पक्षय्, नीछगू मत विपक्षय् व छम्ह तटस्थ व तमलोपाय् प्रस्तावय् स्वंगू मत पक्षय्, स्वीछगू मत विपक्षय् व प्यंगू मत तटस्थ लाःगु खः ।
स्वंगूलिं प्रस्तावं स्पष्ट बहुमत मदेयेवं दकलय् अप्वः वःगु मतयात मूल घारण कथं यंकेगु कुतः जूवलय् विवाद जूगु खः । समितिया सभापितं मतगणना न्यंकेत्येंगु इलय् उर्जामन्त्री डा. प्रकाशशरण महतं निर्णय पुस्तीका लाकाकायेवं विवाद अप्वःगु खः । उगु विवाद मिले यायेत गठन याःगु कार्यदलं मध्यमागी लँपू नालेगु प्रस्ताव याःगु खः । उगु हे प्रस्ताव कथं स्वंगूलिं प्रस्तावयात समानान्तर रुपं दुथ्याकेगु सहमति मंगलवाःया बैठकय् जूगु खः ।
लत्याः लिपाः मंगलवाः च्वंगु समितिया बैठकय् माओवादी सभासद्तय्सं उर्जामन्त्रीं निर्णय पुस्तीका लाकाकायाः अलोकतान्त्रिक व्यवहार याःगु व सभापतिया मानमर्दन याःगु धासें मन्त्री क्षमा फ्वनेमाःगु अडान याःगु खः । लिपाः मन्त्री महतं थम्ह सभापतिया मानमर्दन यायेगु मनासय मदुगु व विधिसम्मत्त प्रकृया नालेत सभापतियात ग्वाहालि यायेत स्वयाःगु खँ धयादीगु ख: ।
