'वर्तमान सरकार इतिहासया हे कमजोर सरकार'
मधेशी जनअधिकार फोरमया अध्यक्ष उपेन्द्र यादवं वर्तमान सरकार देय्या इतिहासया हे दकलय् लाचार व कमजोर सरकार जूगु द्वपं बियादीगु दु ।
फोरमया मंगलवाः निसें शुरु जुइगु केन्द्रीय समितिया विस्तारीत बैठकय् ब्वति कायेत वीरगंज थ्यंकादीम्ह यादवं पत्रकारतनाप खँल्हाबंला यानादिसें वर्तमान सरकार तसकं कमजोर जूगुलिं वयात अंक बीगु खःसा छगू अंक हे दइगु हैसियत मदुगु धयादिल ।
सरकार पूर्ण रुपं विफल जुइधुंकूगु द्वपं बियादिसें यादवं शान्ति सुराक्षाया प्रत्याभुति बीमफुगु, राजनीतिक सहमति यायेमफुगु वर्तमान सरकार दक्वं पक्षं असफल जुइधुंकूगु धयादिल । वयेकलं थ्वहे असफल सरकारया कारणं देय्या अर्थतन्त्र समेत धराशायी जुइगु द्वपं नं बियादिल ।
नकतिनि निर्माण जूगु उच्चस्तरीय संयन्त्रया गठन प्रति आपत्ति प्वंकादिसें वयेकलं वर्तमान संयन्त्रयात स्वंगू दलया जक संयन्त्र दयेकूगुलिं थुकीं समस्याया समाधान मालेत थाकुइगु धयादिल । वयेकलं वृहत सहलह व गृहकार्य लिपाः जक थुगु संयन्त्र निर्माण यायेमाःगु तर अथे मजूगुलिं संयन्त्र पाखें तःधंगु आश यायेगु थाय् मदुगु धयादिल ।
माघ २ गते निसें फोरमं याइगु आन्दोलन शान्तिपूर्ण जुइगु धयादिसें फोरम अध्यक्ष यादवं आन्दोलनया मू उदेश्य् सरकार नाप न्हापा जूगु सम्झौतात कार्यान्वयन यायेत जूगु धयादिल । अथेहे वयेकलं तराईलय् संघर्षरत सशस्त्र पुचः व राजनीतिक पुचःत नाप सरकारं सार्थक वार्ता याना समस्या समाधान यायेमाः बिचाः प्वंकादिल ।
