नेविसंघया खुम्ह केन्द्रीय दुजः पाखें राजीनामा

नेपाल विद्यार्थी संघया खुम्ह केन्द्रीय दुजःतय्सं मगंलवाः थःगु पद पाखें राजीनामा ब्यूगु दु ।

महाधिवेशनया माग यासें केन्द्रीय दुजःत रमेश रायमाझी, बीरबहादुर विष्ट, युवराज पाण्डे, कृष्णकुमारी बस्नेत, राकेश खत्री व सबिना तामाङं राजीनामा ब्यूगु खः । उमिसं नेविसंघया अध्यक्ष प्रदीप पौडेल समक्ष राजीनामा लःल्हाःगु खः ।

राजीनामा ब्यूपिंसं महाधिवेशन मजूगुलिं संगठन अराजक जूगु व संगठन दुने च्वनाः संघर्ष यायेत थाकूगुलिं थःपिनिगु पदं राजीनामा याना:गु खँ धाःगु दु । उमिसं नेविसंघया विधानय् केन्द्रीय समितिया कार्यकाल निदँ जुसां आःया समिति स्वदँ थ्यनेत्यंसां नं महाधिवेशन मजूगु प्रति आपत्ति प्वंकूगु दु ।

राजीनामा ब्यूपिं खुम्ह मध्ये न्याम्ह निर्वाचित व छम्ह मनोनित दुजः खः ।