झंगः मुंकाः विमानस्थल बन्द यायेगु ख्याच्वः
येँ (सन्ध्या टाइम्स)/सछि व न्हय्न्याताजि झंगःया सः पिकायेफुम्ह गौतम सापकोटां थःगु मागयात सरकारं बेवास्ता यात धाःसा अन्तर्राष्ट्रिय त्रिभुवन विमानस्थलय् झंगःत मुंकाः अनिश्चितकाल तकया निंतिं हे विमानस्थल बन्द याना बीगु ख्याच्वः बिउगु दु ।
थःम्ह उलिमच्छि झंगःतय्गु सः पिकायेफुगुयात कयाः गिनिज बुकय् नां तयेकेगु नितिं सरकारं कुतः यायेमाल धकाः इनाप याना नं सरकारं वास्ता मयाःगु हुनिं धकाः वय्कलं उगु कथं ख्याच्वः बियादीगु खः ।
संसारय् हे दकलय् अप्वः झंगःया सः पिकायेफुम्ह थः हे खः धकाः दावी यासें वय्कलं गिनिज बुकय् नां दुथ्याकेगु निंतिं थःगु नां दर्ता याके धुनागु दु धासें आर्थिक समस्याया कारणं थम्हं उकिया प्रमाणपत्र ल्हातय् लाके मफयाच्वंगु खँ कनादीगु दु ।
गौतमं २०६२ सालंनिसें थाय्थासय् सार्वजनिक रुपं हे ज्याझ्वःत यानाः झंगःत सःतेगु याना वयाच्वंगु दु। वय्कलं २०६४ सालय् रत्नपार्कय्, २०६५ सालय् यलया बालकुमारीइ व २०६६ सालय् क्वः सम्मेलन तकं याये धुंकूगु दु। थौंकन्हय् वय्कः नेपाल पंक्षी संरक्षण संघया प्रमुखया भूमिका म्हिता वयाच्वनादीगु दु ।
