संयन्त्रं ज्या याइ मखु: ओली
येँ (सन्ध्या टाइम्स)/नेपाली कांग्रेसया सभापति गिरिजाप्रसाद कोइरालाया नेतृत्वय् माओवादी अध्यक्ष व एमाले अध्यक्ष समेत दुथ्याकाः दयेकूगु संयन्त्रयात एमालेया वरिष्ठ नेता केपी शर्मा ओलीं राजनीतिक गतिरोध अन्त्य याये मफइगु संयन्त्र धयादीगु दु ।
थौं इलामय् संचारकर्मीतलिसे खँ ल्हासें वय्कलं माक्व सहलह हे मयासे स्वम्ह मनूत च्वनाः दयेकूगु उगु संयन्त्र धइगु व्यक्तिया जक संयन्त्र खः धकाः नं द्वपं बियादिल। वय्कलं क्षेत्राधिकार, कार्यविधि व समय अवधि स्पष्ट मजूगु उगु संयन्त्रं राजनीतिक गतिरोधयात अन्त्य याये फइ मखु धकाः दावी नं यानादीगु खः ।
संचारकर्मीतय्गु न्ह्यसःया लिसलय् नेता ओलीं एमाले दुने विवाद व गुट उपगुट मदु धकाः नं धयादिल ।
वय्कलं एमाले पार्टी धइगु लोकतान्त्रिक पार्टी जूगुलिं बहस जुइगु स्वाभाविक खः धयादिसें एनेकपा (माओवादी)या आन्दोलन कलाविहिन नाटक जूगु संज्ञा बिसें माओवादीया व्यवहार मचा म्हितेथें जुयाच्वंगु दु धकाः नं धयादिल ।
