मानव अधिकार सफू बारे समीक्षा
ख्वप (सन्ध्या टाइम्स)/नेपाल मानव अधिकार बर्ष पुस्तक-२०१० या पूर्व समीक्षा ज्याझ्वः इन्सेक ख्वपया ग्वसालय् जुल। ख्वपया प्रमुख जिल्ला अधिकारी दिपकराज नेपाल प्रमुख आतिथ्यय् उगु ज्याझ्वः जूगु खः। ज्याझ्वलय् वय्कलं थुगुसी ख्वपय् न्हापांखुसी निगू निगू गोली काण्ड जूगु खँ न्ह्यथनादिल। एमाले ख्वपया संयोजक सोम मिश्र, मिसा प्रतिनिधि शारदा घिमिरे, नेमकिपा ख्वपया प्रतिनिधि सूर्यबहादुर फोंजू, मानव अधिकार तथा शान्ति समाज ख्वपया प्रतिनिधि किरण न्यौपाने, राष्ट्रिय मानव अधिकार प्रतिष्ठानया प्रतिनिधि रामभक्त सुवालपिंसं थुगुसी ख्वपय् जूगु थीथी मानव अधिकार उल्लंघनया घटना बारे न्ववानादीगु खः ।
इन्सेक ख्वपया प्रतिनिधि अक्रुर न्यौपानेया सभापतित्वय् जूगु उगु ज्याझ्वलय् २०४९ सालंनिसें आः तक निरन्तर मानव अधिकार वर्ष पुस्तक पिथनेगु निंतिं इन्सेक ख्वपपाखें जुयाच्वंगु थीथी कुतः व थुगुसी ख्वपय् जूगु मानव अधिकार उल्लंघनया बारे नं जानकारी बिउगु खः ।
ज्याझ्वलय् नीन्यागू थीथी मानव अधिकार उल्लंघनया घटना बारे नं ज्याझ्वलय् सहभागीतय्त इन्सेक ख्वपपाखें जानकारी बिउगु खः ।
