मोष्टवान्टेड हे प्रहरी हिरासतं बिस्युंवन
धरान (सन्ध्या टाइम्स)/ ल्वाभःनापं ज्वंम्ह छम्ह युवक धरानया इलाका प्रहरी ज्याकूया हिरासतं हे बिस्युं वंगु दु। प्रहरीया मोष्टवान्टेडया धलखय् लाःम्ह १८ दँया उदय लिम्बु वंगु चान्हय् प्रहरी हिरासतं बिस्युंवंगु खः ।
उदय लिम्बु बिस्युंवंगु घट्नायात कयः प्रहरी जवान श्याम साहयात प्रहरीं थःगु नियन्त्रणय् काःगु दु ।
लिम्बुयात वंगु शनिवाः जक एनेकपा (माओवादी)या सहयोगि संगठन वाइसिएलया कार्यकर्तातय्सं धरानया पानमारा लागां एयरगननापं नियन्त्रणय् कयाः प्रहरीयात लःल्हाःगु खः ।
हिरासतया गेटय् तालं ग्वयातःगु हे अवस्थाय् लिम्बु बिस्युंवंगु हुनिं अनुसन्धानया नितिं प्रहरी जवान साहयात नियन्त्रणय् कयागु खः धकाः इलाका प्रहरी ज्याकू धरानं धाःगु दु ।
थीथी अपराधीक ज्याय् संलग्न दुम्ह लिम्बुयात न्हापा नं प्रहरीं ज्वाना हिरासतय् तयातःगु अवस्थाय् अथे हे हिरासतं हे बिस्युं वंगु खः ।
